پاکستانءَ ضیاءُالحقءِ پشتپداں ھرید آرتگ ۔تبصرہ: ولید گربنی

جاوید نصیر رند و صداں کشگ بیتگیں جواناں رکّینگءِ ذمواری تجربہ کاریں ساستکارانی اَت: تبصرہ: ولید گربنی

ھنچوش کہ ماھلہ تر حال آتکگ ات کہ بلوچ حالکار جاوید نصیر رندءِ ٹپ ٹؤر و تیر آماچیں جسد شہ خضدارءَ دستا کپتگ، اے حال بازیں جاگھاں الّم کنگا رند، راستے منّگ بیگا اِنت۔ جاوید رند اِمبری 10 ستمبرءَ ماں حب شپءِ کلاک 9ءَ شہ وتی انٹرنٹءِ دکانا دستگیر کنگ بیتگ اَنت۔ ھما روچا، 6 کلاک ساریا، عبدالصمد تگرانی شہ زاھد میڈیکل سنٹرءِ دیما چاریگاں گپتگ ات۔ عبدالصمد تگرانیءِ ٹپ ٹوریں جسد پرندوشی مردمانی دستا کپتگ ات۔

امریکاءِ دیما اوشتگءِ دعواداریں ایران وتی نادراھاں دوادرمان کت نہ کنت: بلوچی حال

زی ماں چاھبھار شاگردانی یک منندجاھے بن گپت۔ منند جاھا وپتگیں دو بلوچ ورنا ستک و بیران بوت اَنت۔ دگہ سئے سک ٹپی بوت اَنت۔ سئیں ٹپّیانی دوا درمان کنگا چاھبھارءِ جندا کوّاسیں داکٹر نہ بیتگ۔ پمیشا ایشاں زاھدانءَ دیم دیگءِ ارادہ اش کتگ۔ ایرانی حالجاھاں وزارت تعلیمءِ جھانشاھیءِ بٹاکے شنگ کتگ ات کہ ٹپی بالیگرابےءَ دیم پہ زاھدان راہ دیگ بیتگ اَنت۔ البت، شنگ بیتگیں راستیانی وانگا رند مردم سک افسوزیگ بیت۔

اے پاکستان اِنت، عراق یا افغانستان نہ اِنت: جرنل کیانی

امریکاءِ درملکی جاورانی وزیر ھلری کلنٹون و آئیءِ پاکستانی ھمدرور ھنا ربانیءَ ماں اسلام آباد ھواریا گوں حالکاراں تران کت۔ یکے شہ حالکاراں وھدے شہ ھلری کلنٹون جست کت کہ باریں آ گوں پاکستانی فوجءِ سروک جنرل کیانیءَ ھمخیال اِنت کہ پاکستان یک وتواکیں ملکے اِنت و عراق یا افغانستان نہ اِنت! ھلری کلنٹونءَ پسو دات کہ آ گوں جنرل کیانیءَ ھمخیال اِنت۔ البت پاکستانءَ زانگ لوٹیت کہ حقانی ٹولی و طالبان پہ آواں و افغانستانءَ زنڈیں خطرے اَنت۔ پمیشا ایشانی ولگوج کنگا پاکستانءَ گولایش بیگی اِنت۔

پاکستانیانی خون خون، بلوچانی خون آپ

پاکستانی قاضیےءَ ھفت کس گرانیں سزا دات اَنت۔ ایشانی سرا کشمیری دوزےءَ ماں کراچی کشگءِ میار لڈ ّگ بیتگ۔ سرفراز شاہ نامیں دوز دوزیءِ میارا کراچیءِ پارکےءِ پانکوا گپتگ و رینجر پولیسءِ دستا داتگ اَت۔ پولیسا آئی جاہ پہ جاہ تیر جتگ کشتگ ات۔

بی بی سی ۔اردوءَ شنگ بیتگیں حالےءَ داتگ کہ قاضیا تیر جنوکیں سپاھی ظفر شاہءَ دو صد ھزار روپیا ملام و مرگءِ سزا داتگ۔ آ دگہ سپاھی ئی عمر قید و مالی ملامءِ سزا داتگ اَنت۔ سزا دیگ بیتگینانی نیاما پارکءِ پانکو ھم ھوار اِنت۔

سپاھیانی دستا سرفراز شاہءَ کشگءِ ندارگ یک حالکارےءَ رکاڈ کتگ ات۔ رکاڈ کتگیں ندارگءِ شنگ بیگا پد سپاھی دستگیر کنگ بیتگ اِتنت۔

پاکستانی واکدار شہ بلوچستان صدانی حسابا مردم دستگیر کنگ و کشگا اَنت۔ واکدارانی دستا بلوچانی کشگ بیگءِ خلافا شہ سرجمیں دنیاءَ توار چست بیگا اِنت، بلے پاکستانی ھچ کسا کمار نہ کنگا اَنت و وتی انسانکُشی کاراں یکّوئی دستگٹ اَنت۔ مردم ھنچوش مارگا اَنت کہ گشیگا پاکستانیانی خون خون، بلے بلوچانی خون آپ اِنت۔

اُسامه کشگ بیت، أمریکاءَ کشت، پاکستانءِ خاکا

اُسامہ بن لادن کشگ بیت۔ أمریکاءَ جت، بلے پاکستانءِ خاکا۔ گش أنت دنتانے کہ سریت، آخر کپیت۔ اُسامہ بن لادنءِ کشگ بیت؛ شر بیت کہ زیت تر مرت۔
إشکنگا سعودی عربءَ گشتگ کہ اُسامہءِ جسدا پہ کل کنگا جاگہ ندات۔ پاکستانءَ گشتگ کہ أگر آواں جاگہ دات، گڈا پاکستانی ملا اُسامہءِ قبرا زیارتجاھے جوڑ کن أنت۔ پھکیں تک و پھناتانی چاگرا پد أمریکاءَ فیصلہ کت کہ جسدا دریاءَ چگل به دات۔

قذافی ھم نیں زیتر وتا وت بہ کشیت شرتر إنت۔ أگہ نہ گڈا صدامءِ وڑا ٹلـّو ئی کن أنت۔ و دنیاءِ بدنام تریں مردمانی لڑا رئوت۔ أگہ قدافی وتا بکشیت، گڈا اُسامہ بن لادنءِ وڑا بے گور نہ بیت؛ مردم ئی پہ عزت کلّ کن أنت. رندا آئیءِ مَنـّوک پہ وتی ملک حالتءِ سرا گریوگا براں براں قبرءِ سرا شت و ترمپے أرس  وا رتک کن أنت۔

بلوچانی یکجاھیء درورے جوڑ بیت کنت: تبصرہ

انٹر نٹء برکتا مرچاں بلوچ کوھنیں دئورانی وڑا بے توار نہ انت۔ بلے نزوری ایش انت کہ ویبسایٹ سک باز انت۔ نبیسوک کم انت۔ بس لھتے کس انت کہ نبیس انت۔ ھمیشانی سیاھگ ھرجاگہ لنک دیگ بی انت و یا 'کٹ و پئسٹ' بنت۔ باریں ھمے ویبسائٹانی شونکار بلوچانی یکجاھیء مثالے قائم کت کن انت؟

اگر پھکانی یکجاہ بیگ ممکن نہ انت، بلے ھمخیال یکجاہ بیت کن انت۔ پہ مثال آزادی لوٹوکیں مردم یکجاہ بہ بنت، جمھوریت لوٹوک یکجاہ بہ بنت، نبیسوک یکجاہ بہ بنت، انسانی حقانی پانکجن یکجاہ بہ بنت۔۔۔۔ امید انت کہ بلوچ شہ ھنـّیگا 'نٹ ورکنگ' بنا کن انت و یکجاھیء مثال جوڑ کنگ نیمگا رھیج گر انت۔ آ کہ تنظیم انت، آواں اگر جدائیں ویبسائٹ بیت، میاریگ نہ انت۔ البت ھمخیالیں تنظیم ھم باید یکجاہ بہ بنت۔ 

مہ شموشت کہ یکجاھی شمئے جندء کوپتا آسودگتر کنت۔

دنیاءِ بازیں جنگانی سبب برطانیا بیتگ: سروزیر ڈیوڈ کمرون

برطانیاءِ سروزیرا گشت کہ دنیاءِ بازیں جنگانی پاد کنوک برطانیا بیتگ۔ کشمیرءِ باروا یک جستےءِ پسّوا دیگءِ وھدا 'ڈیوڈ کمرون'ءَ إے راستی منّ إت۔

چدا پیسر یکے شہ برطانیاءِ پیسری درملکی جاورانی وزیر 'جک سٹرا'ءَ ھم دنیاءِ بازیں قوماں مختلفیں ملکانی توکا بھر کنگءِ باروا دلپدردی ظاھر کتگ أت۔ وتی وزیریءِ دئورا وھدے آئی عراقی کردستانءَ شتگ أت، گڈا اودا کردستانءِ ٹکر ٹکر بیگءِ باروا وتی خیال ئی درشان کتگ إتنت۔ و وتی ملک ئی ذموار منـّتگ أت۔

پاکستانءِ تھا إے گپا کنگ و کشمیرءِ ناما گرگءِ مقصد پاکستانی واکدارانی دلاں وش کنگ إنت۔ ألبت گوں تاریخی ردیانی منـّگا إے راستی ھم پدّر انت کہ برطانیا بلوچستانءَ ھم یکـّے شہ ھما سرڈگاراں منـّگا مجبور بیت کہ برطانیاءِ سیاستانی سببا بھر بیتگ.

برطانیا سر وزیرء بیان انگریزی زبانا۔

چؤش کہ ودی انت تاریخی ردیاں شر کنگءِ روچا ٹک کتگ۔ مرچی أگر کشمیرءِ نام گرگ بیت، ألمـّا باندا بلوچستانءِ آزادی و یکجاھیءِ منصوبہ بندی کنگ ھم بیت کنت۔

إشتاپی کاراں پاد پلاراں مانگيش أنت: ولید گربنی

مغربی بلوچستانءِ سیاسی حقانی جھدا گلائیشیں 'حزب مردم بلوچستان'ءَ یک حالے داتگ کہ مغربی بلوچستانءِ ورنا وت ماں وتی بحثانی تھا ھمے مارگا أنت کہ پہ قومی حقانی پچگرگا 'مدنی' کار بہ بیت و سیاسی گلاں ھؤر بہ بنت۔ ھمے حالا شہ ورنایاں نقل قول کنگ بیتگ کہ حزب مردم ورنایانی دلدوستریں سیاسی گل إنت!

دنیاءِ ھر زندگیں قوم وتی سرا بیوکیں زوراکیانی دیر کنگا تچ تاچ کنت۔ إے مقصدا جھد کنوکانی توکا ورنا دیما بیتگ أنت و أنگت ھست أنت۔ منظمیں جھدا بلوچستانءِ ورنایانی واھوک بیگ شرّیں مستاگے إنت۔ ألبت سرپدیں مردمانی خیالا ھنـّی دنیا چارگا إنت کہ بانداتگیں روچا إیران چے کنت، إیرانی واکدار کجا بیڑ بر أنت و چنچو کس دستگیر کن أنت یا کش أنت۔ چشیں وھدےءَ بلوچ ورنایانی مارشتاں شورینگ بے عقلیں کارے إنت۔

بلوچءِ سرا مشکلیں وھد آتکگ۔ إے وھد ھنـّی وتی روچاں گوں ٹِکـّارینگ گوازینگا إنت۔ ھما قربانییے کہ بلوچ قوما دیگی بیتگ؛ داتگ ئی۔ جانی قربانی، مالی قربانی، بزگی، نیزگاری، بے وانگی، بے دوادرمانی و وتی سرڈگارءِ سرا درپدریءِ روچ بلوچ قوما ھنچیں وھداں گوازینتگ أنت کہ دگہ قوم وتی عیش عشرتاں بیتگ أنت۔ پھکاں نشتہ سیل چارتگ۔ آواں بلوچانی بزگیءِ سرا اُفــّارگے نہ جتگ، نے کہ ترنپے أرس إش رتکگ۔ نیں کہ عیاشانی کار گٹ أنت، بلوچءِ کوپگا تفنگا إیر کنگ و تیر جنگا واھوک أنت۔ ضروری إنت کہ بلوچ سرپد بہ بنت و پہ دگراں سنگر مہ بنت نے کہ وتی سرڈگارا پہ چشیں کارے کارمرز کنگءِ إجازت بہ دی أنت۔

ملک و قومءِ نگیگانی غمیگ کتگيں نوجوانی سرکچ دیگ سیاسی گلانی ذمواری إنت۔ تانکہ ھمے نوجوانانی وھد وانگ و زانگا بہ گوزیت و پہ بانداتا ملک و قومءِ نگیگیانی دیر کنگا شر تریں وڑےءَ گولائیش بیت بہ کن أنت۔ گوں إشتاپ و سرترپلیں بیانانی شنگ کنگا سیاسی گل وتی جندا سبک کن أنت و بلوچ جواناں بے مقصدا دلسیاہ کن أنت۔

حزب مردم بہ بیت یا دگہ گلے إیشانی ذمواری إنت کہ میانملکی بنجاھانی دیما بلوچءِ مشکلاں گوں علمی دلیل پیش بہ کن أنت۔ پرچاکہ مرچی أگر یک کردے دستگیر بہ بیت، عربے یا آذری مردمے گڈا ما گندیں دنیاءِ دیما یک سیاسی جھدکارےءِ حسابا ظاھر کنگ بیت إنت۔ میانملکی سیاسی و إنسانی حقانی پانکجنیں گل سیاسی 'فعالے'ءِ حسابا آئیءِ پانکجنیا کن أنت۔ ألبت بلوچستانءِ جوان و یا کماش أگر دستگیر بنت، إیش نشوی درمانءِ سوداگر ظاھر کنگ بنت یا کٹریں سنـّی۔ ھمے ناما بازیں بلوچ کشگ بیتگ، بلے یکـّےءِ گؤشا مورےءَ ھم نہ وارتگ۔

بازیں مردمانی خیالا حزب مردم پہ واکداریءِ کرسیا سربیگا سک إشتاپ کنگا إنت۔ گوں إے إشتاپیا إے گلءِ جھدکار وتی پاداں پلاراں مانگیشین أنت و مفتا بلوچ جواناں دلسیاہ کن أنت۔ بلوچ نوجواناں سرپد بیگ لوٹیت کہ إیرانءِ واکدار سُھر بہ بنت، سبز و نیل؛ بلوچانی قسمتا مٹـّینوک آ وت أنت۔ و بلوچءِ بھت إیوکا گون زانت و سرپدی ٹگلینگ بیت کنت۔ نے کہ گوں سر وتیں جنگ و چؤپ۔

بلوچ پہ پھلـّی لوٹگا کوھاں نہ شتگ انت: بی آر پی

بلوچ رپبلکن پارٹیءِ کارگشاد داکٹر بشیر عظیمءَ گشت کہ پاکستانی بیرقا سلام کنگءِ بیان رحمان ملکءِ بلوچ دشمنی کارکرداں شون دیگا انت۔ آئیا سرپد بیگ لوٹیت کہ بلوچ پہ پھلـّی لوٹگا کوھاں نہ شتگ انت۔ آ شہ دشمنا زوراکیانی بیڑاں گرگا شتگ انت۔

داکٹر بشیر عظیمءَ دیمترا گشت کہ ریاست یک نیمگے بلوچ جواناں کشگ و دئور دیگا انت و دومی نیمگا راھدربرانی خلافا زبان دراجی کنت۔ اے ھر دوئیں کارکرد لایق ایرجنگ انت۔ بلوچ قوم نتاوھدی کہ وتی منزلا سر نہ بیتگ، جھدا برجاہ داریت۔

بلوچ نشنل موومنٹءِ گوانکوا ھمے ردا وتی بیانےءَ گشت کہ سامراجی سیتانی پانکیں ریاستءِ غلامیں فکرانی واھندیں ندکار آزادی پسندیں گل و راھدربرانی خلافا نازیبائیں خبر زھرشان کنگا انت۔ ایشانی کارکرد راست ثابت کنگا انت کہ ایش کپتگیں دودمانےءِ واھند انت۔

بی ان امءِ گوانکوا دیمترا درائینت بلوچ قوم وتی آزادیءِ دوستیا ملکءِ ھر کنڈا وتی جاناں ندر کنگا انت و دشمنا کلہ دیگا انت آئیءِ بیرق بلوچاں نہ پیئت۔

"ڈیرہ بگٹی و بولاں دمگءِ ھؤریا مرچی زؤرگراں سرجمیں بلوچستان وتی حیوانی کارکردانی آماچ کتگ۔ بلوچ قوم گوں وتی باسکانی زورا و تاریخ بے رحمیں راھبندےءِ اے زوراکیانی حسابا جست کن انت۔ روچتاک انتخاب و توارء منـّتا

تبصرہ: پاکستانءِ بے راھیاں مرچی پاکستانءِ بیرق پہ اودءِ مردماں اے لایق نہ اشتگ کہ آئیا سلام کنگا پھر بہ بند انت۔ یک آزادی لوٹوکیں بلوچےءَ اگر شہ اے ملکا بد بئیت؛ آئیا میاریگ کنوک میاریگ انت۔

وتی درور ما وتیں

مبارکءِ نامبارکیں حکومتءِ پاردوم چوٹ بیتگ۔ گپ ایش نہ انت که مصری مردم شه گودالا در بی انت و چاتا کپ انت۔ پرچاکہ سرجمیں منطقهءِ مارشت و واھگ هنچؤش انت۔

درتکگیں مردمانی ھزار تابلو هم واننده و سروکانی دیما دارگ بہ بنت و مردم کوکـّار بہ کن انت "اے وڑا مہ بیت" پدا ھم آ وتی فرعونءَ باید که خدایی مدتا جالا به کش انت.

آوانی چاتا کپگ المّی انت. نباید آوانی سیلا نندگ و توان یا ناتوانیءِ قصواں بیاریں. پرچاکہ آ شہ آگاهیا پہ وابا رو انت و ما نوکی شہ وابا دریه کتگ. ماں ایران همی مروچی هم ده نفر اش درتک.

مرچی مارا ھمے حبر چارگ لوٹیت کہ وھدے دیو در کپت آیوکیں فرشتہءِ بار هروت و راپنگ مبیت. مرچییں سرحال اے 'میراثءِ امامی' تعریف بیت: هر اداره بُری آخوند، هر گس بُری اعدامی.

عبدالقادر بلوچء منـّتا

سید یوسف بلوچءَ شہ فوجیاں رکـّینگءِ مردمانی کارکرد لایق ستا انت: وطن موومنٹ

بلوچ وطن موومنٹءِ بنجاھی گوانکوا گشت کہ ماں شال سید یوسف بلوچ -بی ان امءِ چیردستیں سروکا شہ بلوچستان کانسٹبلریءِ سلاحبندیں مردمانی دستا رکـّینگءِ مردمی کارکرد لایق ستا انت۔ و امید انت کہ بلوچستانءِ دگہ ھندانی مردم ھم ھمے وڑا گوں دلیری دیما در کا انت و دشمنانی توجیلاں بے سوب کن انت۔

توار اخبارا شنگ بیتگیں بیانءِ توکا سید یوسف بلوچءَ چکانپگءِ جھد و آئیا ٹپیگ کنگءِ سرکاری کارکرد ایر جنگ بیتگ۔ پدا خبر گيئش کتگ کہ بلوچ جُنزا واکدار بے گوئم کتگ انت، پمیشا آ ھر روچ بلوچ جواناں دستگیر کن انت و آوانی ٹپ ٹوریں جسداں دئور دیگا انت۔

بلوچی نیوزءِ نیمگا مدام ھمے خبر ظاھر کنگ بیتگ کہ ھنچیں جاوراں کہ بلوچستانءِ مردم سرپد انت کہ آوانی جھدکارانی دستگیر بیگا پد جسد رس انت، مردمانی حق و ذمواری انت کہ جھدکاراں دستگیر کنگءِ دیما گوں مردمی طاقتا بہ دار انت۔ ایوکا مردمی زور بلوچستانءِ توکا جھدکارانی سرا بیوکیں زوراکیاں پرؤش دات کنت۔

سال 2011ءَ پہ بلوچ سیاسیانی تپاکیا جھد بیت انت

The magnificent 7 Baluch leaders

'بلوچانی امریکائی دوست' نامیں گلا سال 2011ءَ وتی جھد پہ بلوچانی تپاکیا وقف کنگءِ جار جت۔ گلا گشت کہ اے سالا واجہ پیٹر تاچلءِ جوڑ کتگیں آزادیءِ چارٹرءِ سرا بلوچاں یکجاہ کنگءِ جھد بیت انت۔

واجہ پیٹر تاچلءَ گوستگیں سالءِ گڈی ماھا یک چارٹرے جوڑ کتگ ات و ایشی ئی بلوچستانءِ آزادیءِ چارٹر بیان کتگ ات۔

بلوچانی امریکائی دوست نامیں گلا وتی بیانا گشتگ کہ بلوچستانءِ ھفت سیاسی واکاں یکجاہ کنگءِ جھد کنگ بیت انت۔

ھفتیں واک خان قلات سلیمان داؤد، بلوچ نشنل وائسءِ میر خیربیار مری، بلوچ رپبلکن پارٹیءِ میر براھمدغ بگٹی، مینگل پارٹیءِ سردارزادہ اختر مینگل، بلوچ نشنل موومنٹءِ سروک خلیل بلوچ، بی اس او-آزادءِ پیسری سروک داکٹر اللہ نظر و نشنل پارٹیءِ سروک داکٹر عبدالمالک بلوچ ظاھر کنگ بیتگ انت۔

چدا پیسر نشنل پارٹیءِ جھد بازیں آزادی لوٹوکاں ڈالچار کتہ بیتگ و نشنل پارٹی اش پاکستانی واکانی پلانگری زیروک لیکتگ۔ بلوچانی امریکائی دوست گلءِ سریں جھدکار احمر مستی خانءَ ھم ماں وتی بازیں سیاھگاں نشنل پارٹی ایرجتہ بیتگ۔

بلوچانی امریکائی دوست (اے اف بی)ءَ شہ کماشیں بلوچ سردار خیربخش مری، سردار عطاءاللہ مینگل، سردار شیرباز مزاری، داکٹر عبدالحئی، عبدالنبی بنگلزئی، اسما‏عیل امیری، جمعہ خان بلوچ و سعید امیریءَ دستبندی کتگ کہ پہ ھفتیں واکانی یکجاہ کنگا ھمدست بہ بنت۔

سال 2010ءَ پہ بلوچستانءِ آزادی بیوکیں جھدءِ توکا لھتے بلوچ ٹولیانی کردءِ ڈالچار بیگءِ سببا بلوچانی توکا ناتپاکی برجاہ ات۔ شہ ھمے ناتپاکیا دشمناں سوب چست کت و بلوچ جھدا مزنیں جانی و مالی نقصان اش دات۔

بلی توریں اے اف بیءِ اے نوکیں توجیل گندگا یک ھنچنائیں گپے انت، البت اگر اے خبر گوشدارگ و چارگ بیت گڈا پہ بلوچستانءِ بانداتا یک نیکیں پالے بیت کنت۔ امید انت کہ بلوچستانءِ سیاسی واک اے گامگیجا گوں ستکیں دلاں چکـّاس انت۔

بلوچستان زیورے نہ انت کہ بھا زیرگ بہ بیت: اسلم بوتانی

کوئٹہ: مشرقی بلوچستانءِ پارلمنٹءِ گوانکو واجہ اسلم بوتانیءَ گشت کہ پاکستانی سروزیر پرگِنگی سرکارا مجبور کنگا انت کہ آئی عرب شھزادوانی گورا بلوچستانءِ ھزاراں ھکٹر زمین بھا بہ کنت۔

کوئٹہ پرئس کلبءِ دیما واجہ بوتانیءَ پاشک کت کہ پاکستانی سرکار مشرقی بلوچستانءِ بیلہ دمگا 70،000 ھکٹر زمین عرب شھزادوانی گورا بھا کنگا دلمانگ انت۔

آئیا سرکچ دات کہ بلوچستان پوشگی زیورے نہ انت کہ کسےءِ گورا بھا کنگ بہ بیت۔

مشرف سرکارءِ دئورا ھمے زمینءَ پاکستانی فوجءِ گورا اَرزانیں نھادےءَ بھا کنگءِ پلان ٹھینگ بیتگ ات۔ ھنیگیں پرگنگی سرکارا کہ واک دست گپت، گوں فوجا جَتگیں سودا نہ منّ ات۔

اسلم بوتانی گشت: وھدے ما ملکءِ فوجا اے زمینءَ دیگا ساڑی نہ بیتیں، چونکا ایشیا ما درملکیانی گورا بھا کت کنیں؟

آئی دیمترا سرکچ دات کہ ھندی مردم صداں سال انت اے زمینءِ سرا زند گوازینگا انت۔ پہ عرب شھزادواں شکارجاگھے اڈ کنگءِ مقصدا اے مردم درانڈیھ کنگ نہ بی انت۔ روچتاک ڈانءِ منـّتا۔

تبصرہ: اسمبلیءِ گوانکوءِ اے خبر پیشدار انت کہ پاکستانی اسمبلیاں روگ انچو بد نہ انت کہ بازیں جزباتی بلوچ گش انت۔

سلاحبندیں جنگءِ سرظاھریں پلانگری دیم پہ تباھیا برگا انت: بلوچی نیوز

بلوچستانءِ سلاحبندیں جنگءِ باروا براں برانا ماں اے بلاگا نظر درشان کنگ بیتگ انت۔ مدام ھمے جھد بیتگ کہ سلاحبندیں جنگولانی خلافا خبرے شنگ مہ بیت۔ و یکـّوئی ھمے خبر کنگ بیتگ کہ سلاحبندیں جنگولانی 'علی الاعلان' حمایت سیاسی ردییے انت۔

تاریخ شون دات انت کہ سلاحبندیں جنگءِ پچیں سیاسی پلانگریءِ عاقبت سیاسی جھدکارانی دستگیری، لٹ کٹ و کشگ بیگ انت۔ تاریخءِ داتگیں ھمے درس مرچی بلوچستانءَ جکسینگا انت۔

نایافتیں سراں رکـّینگءِ ذمواری بلوچ نشنل فرنٹ و آئیءِ ھمخیالانی کوپگان انت۔ اے ٹولیاں ھوریں سیاستکاراں شہ دستبندی انت کہ وتی سیاسی کشکا تچک بہ کن انت۔ پرچاکہ بلوچءِ دشمن رستر انت۔ گوں رستراں رستری کنگ عقلمندییے نہ انت؛ جاھلییے انت۔

اودا کہ سلاحبندیں جھدکارانی خبر کئیت، ایشی ھماوانی سرا یلہ دیگ بہ بیت۔ آ وت فیصلہ بہ کن انت کہ کدی جنگ کن انت و کدی وتی دستاں دار انت۔ سیاستکار پہ بلوچستانءِ آزادیا وتی سیاستا گوں علم، دلیل و منطق دیما بہ بر انت۔ تاں بلوچستانءِ مردم منظم بہ بنت و پہ وتی حقانی پھازگا سیاسی گلانی پشتا بہ بنت۔

اگر بی ان افءَ گونیں سیاسی ٹولی وتی پشتا چماں شانک بہ دی انت، گڈا باز کس نہ گند انت۔ المـّا ایشی آوانی سیاسی کشگءِ تچک کنگا شرتریں راھشونی انت۔

وھدے کہ بلوچستانءِ ٹالیں بیرق دشمنانی ھؤشا بارت، تفنگ چست کنگءِ ضرورت پرچا؟ حال و تبصرہ

زییں روچا وھدے تمپ شھرءِ قلاتا بلوچستانءِ بیرقے ٹال کنگ بیت، گڈا پاکستانی فوجی سربتگ بیت انت۔ آواں رسگا قلاتءِ سرا ٹالیں بیرق ایرگپت۔ ھمے درگتا عادل باھوٹ نامیں جوانسالے دستگیر اش کت۔

شہ ایشی پد فوجی میتگءِ تھا پترت انت۔ اودا مردمانی کارجاہ و لوگانی سرا ٹالیں بیرق اش ایر گپت انت۔ اے درگتا بازیں مردم اش لٹ کٹ کت انت۔ اے حال بی یو سیءَ شنگ کت۔

دو روچ ساریا بی اس او –آزادءَ ھم بلوچستانءِ وانگجاہ و دگہ سرکاری بنجاھاں گشتگ ات کہ آ وتی مچّیاں پاکستانءِ قومی سوتا مہ وانین انت و ماڑیانی سرا پاکستانی بیرقا ٹال مہ کن انت۔ اگر اے خبر گرگ نہ بیت، گڈا ھندی مردم زھر گر انت۔

ودی انت کہ بلوچستانءِ بیرقءِ ٹال کنگ و پاکستانءِ بیرق، قومی سوتءِ بائیکاٹ کنگ اودءِ فوجیاں سک تئورگا انت۔ ایش پہ آزادیں بلوچستانءَ مردمانی واھگاں ھم پیئشدارگا انت۔

پمیشا روا بیت اگر مردم بہ گشیت کہ وھدے بلوچستانءِ بیرقءِ ٹال کنگ و پاکستانءِ بیرق و قومی سوتءِ بائیکاٹ کنگ بلوچ دشمناں ھنچؤش کہ تیراں تورینیت، گڈا پرچا بلوچ تفنگ چست بہ کن انت؟

بلوچ نشنل موومنٹءِ کونسل سئشن و باسکانی ذمواری: بلوچی نیوز

ھر گل یا سیاسی پارٹی و جنزءِ کونسل سئشن پہ قومءِ آیندوا امیدءِ کشارے کشیت و راجی سیاستءِ ردوم دیگا مزنیں توجیلے انت۔ شہ ملکءِ اوارین کنڈاں سیاستکارانی مچ بیگ، دراجکشیں مطالعہ و جھدا پد تنظیم و ملکءِ جاورانی سرا یکـادگرءِ دیما دراجکشیں پولکاری نظراں درشان کنگ، و پدا ھؤریا ھنچیں فیصلوے کنگ کہ آئی تنظیم و ملکءِ آیوکیں سیاستءِ راھا تچکتر بہ کنت؛ مرچی پہ بلوچستانءَ سکـّیں ضرورتے انت۔ چشیں وھدا شہ دگہ ھرچیزا گیئشتر ضرورت شہ جوشا درایگ و گوں ھؤش فیصلہ کنگ انت۔

بلـّی توریں بی ان امءِ پیسری سروکاں ملک و قومءِ درد پر بیتگ، بلے آئیءِ توکا شہ ھؤشا گيئشتر جوش کامرز کنگ بیتگ۔ جوشی فیصلوانی سببا تنظیم باز تاوانبار بیتگ۔ گچینی سر دشمنءِ دپا کپتگ انت، کشگ و شہ قوما سندگ بیتگ انت۔ ایشیءِ کشا بازیں سیاسی جھدکار تنظیمءِ بدواہ جوڑ کنگ بیتگ انت۔ پیسری کونسل سئشنانی بروردا  بلوچ گل دو یا سئے بھراں ٹکـّر ھم بیتگ انت۔

بی ان امءِ کونسلر پیسری نزوریاں شہ درس بہ گر انت و وتی تنظیما بھر بن بیگا مہ الّ انت۔ آواں سرپد بیگ لوٹیت کہ بلوچستان یک پراہ و شاھگانیں سرڈگارے و آئی توکا مخلتفیں گل پہ قومءِ شریں باندات و آزادیا وتی وڑ و توانا جھد کنگا انت۔ آوانی خلافا جنگءِ فرنٹے پچ کنگءِ بدلا بی ان ام گوں آواں ڈائلوگءِ راها گچین بہ کنت۔ جھد بہ بیت کہ آواں شہ وت سندگ و دیر کنگءِ بدلا اعتمادا بیاریت و آوانی ھورکاریا بلوچ عواما موبلائز بہ کنت۔

سلاحبندیں جنگول وتی وڑا کارا گولائیش انت۔ بی ان ام وتی واک و توانا سیاستءِ پڑا کارمز بہ کنت۔ پہ اے مقصدا دنیاءِ سیاسی جھداں مطالعہ کنگ ضروری انت۔ اگر شہ دنیاءِ جھداں گستا بلوچ جھدا وتی وڑا دیما برگءِ ھستیں راهبند برجاہ دارگ بیت، گڈا ھما پیسری ثمر و تاواناں شہ گيئشتر ھچ دستا نہ کپیت۔ بزاں دو گام دیما روگا پد سئے گام پشتا کنزگا مردم مجبور بیت انت۔

سلاحبندیں جنگءِ سیاسی حمایت آ ڈولا کہ بلوچستانءِ لھتے سیاستکاراں کتگ، نہ بیت۔ چدا پیسر بی ان امءِ پوزیشن شہ سیاسی حمایتا گيئشتر گوں آواں ھمراہ بیگءِ وڑا بیتگ۔ سیاسی جھدکار وھدے گوں سلاحبندیں جنگولاں جسمانی ھمراہ بی انت، گڈا سیاستءِ پڑ پہ دشمناں خالی بیت انت و بدواہ سوب کن انت۔ پمیشا اے سوب بلوچ قوم دشمناں دیگ مہ بیت۔

البت قومی بیرق اگر ھنوگیں بی ان امءِ بیرقءِ بدلا زیرگ بہ بیت، باز جوانتر بیت انت۔ پرچاکہ عوامءِ دیما اے مارشت ردوم زیریت کہ بیرقءِ واھند بلوچ قوم انت و ھمیشی قومی بچّار انت۔ ھر کس وتی لوگءِ سرا بلوچستانءِ بیرقا ٹال بہ کنت آئیءِ چکـّا سلاحبندیں جنگولے بیگءِ میار لڈگ نہ بیت انت۔  بی ان امءِ کار هم آسودگتر بی انت۔ پرچاکہ ھنـّی بی ان امءَ دو بیرقاں بڈ ّا کنگءِ ذمواری گون انت۔

ناگمانءِ گواچن: بلوچ چرتی نھر بہ کنت

ناگمان مدام 'گواچن' سرحالا کسانیں بلے نقدیں تران نبیسیت۔ اے رندی ناگمانءَ نبیستگ:

غلام محمدءَ بہ گر داں علی شیر کردءَ؛ پاکستانءَ بازیں بلوچ چست کتگ انت و پدا آوانی جون دستا کپتگ انت۔ چیزے مدت انت کہ دشمنا وتی (زوراکیءِ) راھنبد مٹینتگ۔ ھنی آ چست کنت بارت و چیزے روچا رند جون رس انت۔

منی خیالا ایشیءِ جوابا بلوچاں ھما وڑا کنگ لوٹیت کہ جواھر لال نھروءَ سوج داتگ۔ نھرو گشیت "آجوئیءِ جنگ چرتءِ وڑا مڑگ لوٹیت۔ چرت ظاھر نہ بیت، بلے آئیء کرینژوکیں آواز گؤشاں کرّ کنت"۔

طالبان ھمے وڑا کنگا انت۔ آواں سربرا گلے نیست انت، بلے چیرکائی جنگا انت۔

منی خیالا وھد آتکگ کہ بلوچ 'نھروءِ چرت'ءِ رپکا بہ زیر انت۔ چیاکہ بی اس او –آزادءَ ابید سربرءِ آزادی پسندیں گلانی چشیں کردے پشت نہ کپتگ۔

دلگوش: برزا داتگیں سیاھگ روچتاک 'توار'ءِ بلوچی تکا جمعہ 1 اکتوبر 2010ءَ شنگ بیتگ۔ پہ واناکتر کنگءِ مقصدا بلوچی نیوزءَ لھتے گال، گالبند و نبیسگءِ راھبند ٹگلینتگ انت۔

......

تبصرہ: ولید گربنی

ناگمانءِ اے کسانیں سیاھگا بازیں خبر ظاھر کتگ انت کہ چارگ و سرکچ ورگ اش پکار انت۔

منی خیالا ناگمانءَ گوں اے خبرانی ظاھر کنگا دلیری کتگ۔ پہ ایشی ناگمان شاباشی دیگ لوٹیت۔ زانگ بیگا انت کہ نیں ناگمانءَ وتی ھؤشءِ کارمرزی بنا کتگ۔

آئیءِ پیسری 'گواچنانی' وانگا وا بازیں کس سربتگ کتہ بیتگ انت۔ مردم حیران بیتگ انت کہ ناگمانءِ وڑیں وانندویں مردمے چونکا غیر علمی خبر نبیسیت و پہ تالان کنگا تاکبند و مھتاکانی سرا دیم اش دات۔

نیں کہ ھؤشا کاربندگا انت، امید انت کہ مردم ناگمانءِ ھمے 'گواچنا' جهدکار وتی چادرءِ لمبا بند انت و مدام وتی جھدءِ ھمراہ ئی کن انت۔

من مدام شمالی آئرلنڈءِ آزادیءِ جھدءِ مثال داتگ و ھمے گشتگ کہ بلوچ پارلمنٹاں بہ رو انت، اسٹبلشمنٹاں ھؤر بہ بنت و اگر موہ دیگ بیت انت؛ زندءِ آدگہ تکاں گوں دشمناں ھمراہ و ھمدیوان بہ بنت۔ (ترانگ بہ کپ ات کہ ناگمانءِ جند سرکاری ملازم و پگار وارے انت۔) اے راھا دشمناں شرتر پجّا کار انت۔

من وا اے وھدی سلاحبندیں جنگءِ خلافایاں۔ منی خیالا ھنـّی سلاحبندیں جنگ ھر نیمگا بیگا انت و زوراکیءِ آماچیں ھزاراں مردمانی چیھال ھچ کسءِ گوشا نہ کپگا انت۔ دردءِ آماچیں مردم ھنچونائیا نہ چاریت کہ آئیءِ کوکـّارا اشکنوک نیست پمیشا کوکـّار مہ کنت، بلے سلاحبندیں جھدءِ مھار مردمانی دستا انت کہ آ وھدا گچیں بہ کن انت۔

پدا ھم پہ بلوچستانء آزادیا سیاسی جھد کنگءِ بدلا لھتے بلوچ تفگاں کارمرز کنگ بہ لوٹ انت، گڈا ضروری نہ انت کہ سیاسی، لبزانکی و چاگردی جھدکار کراچی، لاھور و اسلام آبادءِ دگاں در بہ کپ انت و آواں زندہ باد بہ گش انت۔ ایشیا ھچ عقل قبول نہ کنت۔

پہ سیاسی، چاگردی، لبزانکی و دگہ قومدوستیں جھدکاراں سلاحبندیں جھدکارانی پلانگریا ھمنچوک گشگ بس انت کہ جنگول میاریگ کنگ نہ بی انت۔ پرچاکہ پاکستان و ایران بلوچانی سرا ناروائی کن انت۔ سلاحبندیں مردم ناروائیانی جوابا گوں تفنگ دیگ لوٹ انت۔ اے کشک ھماوانی وتیگ انت، سیاسی گلانی نہ انت۔

ھنچوش کہ ھنی بیگا انت؛ رد بیگا انت۔ ھنـّی ھر زھگءِ دیما پاشک کنگ بیتگ کہ بی ال افءِ سروک کئے انت، بی ال اےءَ کئے راھشونی کنت و بی آر اےءِ کارانی منصوبہ بندیاں کئے کنت! اے پھک پہ بلوچستانءِ آزادیءِ جھدا نقصان انت۔

اگر داکٹر اللہ نظر گوں حالکاراں تران کنت و گشیت کہ داکٹر و وکیل سلاحبندیں جھدا ھمراہ انت۔ اے خبر راست بہ بیت یا رد، دشمن ھمے وڑیں بلوچاں وتی زوراکیءِ آماچ کنت۔ سلاحبندیں جھدا زانگ مہ بیت کہ آئیا کئے سروکی کنگا انت و گوں آواں کئے ھمراہ انت۔

سیاست گوں تفنگ رواج دیگ نہ بیت. تبصره: بلوچی نیوز

پاکستانءِ توکی جاورانی نادوستیں وزیر رحمان ملک لھتے روچ ساریا بلوچستانءَ شت۔ اودا آئیا خیال درشان کت کہ تفنگداراں بلوچستانءِ سیاست شہ سیاستکاراں پچگپتگ و مردمانی نیاما یک ترسے ودی بیتگ۔ پمیشا سیاستا پچگرگ و پدا سیاستکارانی دستا دیگا سرکارا نیں لانک بستگ۔

بلوچستانءِ سیاستا رودوم دیگءِ مقصدا رحمان ملکءَ جار پرّینت کہ آئیا پولیسءِ ذمواری سیمسری فوجءِ دستا داتگ انت۔ چدا پد سیمسری فوجا حق انت کہ آئی لوگاں بہ پتریت و ھما مردماں کہ آوانی سرا سلاحبندیں جنگا گون بیگءِ شک بہ بیت، دستگیر بہ کنت۔

چوناھیا شہ رحمان ملکءِ گپاں ساری سیمسری فوجا بلوچستانءَ آس روک کتہ بیتگ۔ میار و بے میاریں بلوچاں دستگیر کنگ و آواں چیریں بندیگجاھاں دارگ ایشانی کارکرد بیتگ۔ بازیں کس سیمسری فوج و چاریگانی لٹـّاں کشتگ انت۔ دگہ بازین اش لنگ و مونڈ کتگ، و یلہ داتک انت۔ تانکہ پہ آدگراں عبرت بہ بنت۔

سربتگیں رحمان ملکءِ آدگہ کارانی وڑا ماں بلوچستان سیاستا رواج دیگءِ نوکیں توجیلا ھم مردم سربتگ کتگ انت۔ پرچاکہ ھر کس سرپد انت کہ سیاست گوں تفنگ رواج دیگ نہ بیت۔ اگر مردماں سیاستءِ پڑا آرگ مقصد بہ بیت، گڈا اولا پاکستان وتی تفنگیاں شہ بلوچستانءَ در بہ کنت۔ رندا بلوچ وتی تفنگاں کارمرز کنگا انگار کن انت۔ اے وڑا مردم سیاستا بھر زیرگا بنا کن انت و سیاسی جاوراں گوں سیاست ٹھین انت۔

نادر گچکیءِ کوش و سرمچارانی اشتاپکاریءِ تھلیں تام –بلوچی نیوز

چیزے وھد ساریا اخباراں داتگ ات کہ بلوچ سرمچاراں کینگی بابت خانءِ سرا حملہ کتگ، بلے آ رکـّتگ۔ کینگیءِ رکـّگا رند ھنوگاں حال تالاں بیت کہ پیرسالیں نادر گچکی کشگ بیتگ۔ نادر گچکی باروا سرپدی رس ات کہ سرمچارانی پلانگری زیروکے بیتگ

سرمچارانی پلانگری زیروکاں نادر گچکیءِ بیڑا گرگءِ مقصدا ماں تمپ مرادبخش گھرامءِ دکان مانداشتگ و آئی کٹمءِ لوگانی سرا راکٹ دئور داتگ۔

بلوچی نیوزءِ شوھازکاریءِ ردا مراد بخش و کینگیءِ نزیکی ایوکا ایش انت کہ سانگبندیءِ سببا ایشانی لوگاں روگ و آیگ بیتگ۔ ایشیا ابید مرادبخشءَ گوں کینگی ھچ فکری نزیکی نہ بیتگ۔ سانگبندیءِ وهدا هم شہ سرمچارانی نیمگا کسےءَ کلہ راہ نہ داتگ کہ کینگی آوانی نادوستیں مردمے انت۔

مرادبخش و آئیءِ کنبءِ دگہ مردمانی نزیکی شہ بندرا گوں بلوچستانءِ قومدوستاں بیتگ۔ مرادبخشءِ پت نامییں میر گوھرامءَ پہ بلوچ ننگ و دودمانءِ پهازگا بلوچستانءِ سرا حملہ کنوکیں گجرانی دیما وتی سر داتگ و شھید بیتگ ات۔

اے حسابا اگر بچارئے، گڈا مردم ھمے سرپد بیت انت کہ بلوچ سرمچار وتی دشمنانی جاہ آرگا یکـّوئی رد ورگا انت۔ چدا پیسر میر مولابخش دشتی کہ شھید بیتگ ات۔ آئیءِ باروا ھم سرمچارانی پلانگری زیروکانی بیاناں مردم حیرانیءِ کورچاتاں دئور دات انت۔

نادر گچکیءِ کوشا پد بازیں کساں وتی لیڈریءِ پیشدارگا وڑ وڑیں بیان دات انت۔ البت شہ پھکاں گيئشتر حیران کنوکیں بی آر اس اوءِ گلزار دوست بلوچءِ بیان ات۔

21 آگستءَ بی آر اس اوءِ بیانے کہ روچتاک انتخابءَ شنگ ات، مفت خدا نشنل پارٹی وتی ڈوبارگانی دیمپان کتگ و وانوکاں ھمے گشگءِ جھد بیتگ کہ نادر گچکیءِ کوشا نشنل پارٹیءِ دست و یا واھگ ھؤر انت۔

بی آر اس اوءِ سروک گلزار دوست بلوچءَ نشنل پارٹیءِ بیان کہ نادر گچکیءَ جنگءِ کارکرد ئی ایر جتگ ات، چٹا ڈالچار کتگ۔ اے ڈالچاری بلوچانی تپاکیءِ دلا یک گلمیخے جنگءِ برابر انت۔

ھنـّی زانگ بیگا انت کہ مولابخش دشتی جنگا یا مرادبخشءِ دکانءِ سوچگا و آئی لوگءِ سرا راکٹ دئور دیگا ھچ قومی سیت ودی نہ انت۔ دیمترا ھم ھمے وڑیں کار مردمانی دلاں بد کن انت و آ شہ سرمچارانی کارکرداں دلپروش بی انت۔

اگر بلوچستانءِ جھدا صفاییں وڑےءَ دیما برگءِ واھگ دلا ایر کنگ بہ بیت، گڈا ضروری انت کہ سرمچار و آیانی حمایتی شہ اشتاپی گامگیجاں وتا بدار انت۔ تانکہ اشتاپیءِ تھلیں کجّلءِ آماچ آیوکیں نسل مہ بیت۔