خدا حافظ زرۏمبش

ھما سنگتاں کہ منی زرۏمبش ې باسکیا سھیگ بیتگ اَنت، سرپد کنگ لوٹوں کہ من چه زرۏمبش ئا درکپتوں۔ منی درکپگ ې سبب سلاحبندیں جنگانی خلافا زرۏمبش ئا پالیسی یے نہ بیگ اِنت۔

ماں بالگترءَ کشگ بیتگیں شش سلاحبندیں بلوچانی باروا لھتے جستانی پسّہ

دلگوش:  اے سیاھگ قومی تپاکیءِ خاطرا دیر کنگ بوت۔

وتی اختلافاتاں مردم انچو دیر مہ بارت کہ پدا چھْر کنگءِ راہ گار بہ بنت۔

شمئے کستر

ولید گربنی

شما سرپد اِت؛ دانکے پہ بلوچی نیوزءِ وانوکاں

بلوچی نیوزءِ گرانقدریں چاروکاں منی ڈولا شما سرپد اِت کہ بلوچی زبانا وانوک کم اَنت۔ گیشتریں بلوچی وانوکانی جند نبیسوک اَنت و گیشتر بلوچی نبیسوک شاعر اَنت۔ اے حسابا اگر چارگ بہ بیت، گڈا من گوَستگیں پنچ سالاں گوں اے بلاگءِ شنگ کنگا وتی وھد باھینتگ۔ البت، من چوش نہ لیکاں۔ اگر سرجمیں سیتاں کسے ڈالچار بہ کنت، ایوکا منی جندءِ بلوچیءِ شرتر بیگ منی خیالا منی داتگیں اے وھدءِ لایق اِنت۔

نشنل پارٹیءَ بی ال اف میاریگ کنگا اِنت کہ آزادی لوٹوکاں حمایت کنت! چمشانک: ولید گربنی

جاوید نصیر رند و صداں کشگ بیتگیں جواناں رکّینگءِ ذمواری تجربہ کاریں ساستکارانی اَت: تبصرہ: ولید گربنی

ھنچوش کہ ماھلہ تر حال آتکگ ات کہ بلوچ حالکار جاوید نصیر رندءِ ٹپ ٹؤر و تیر آماچیں جسد شہ خضدارءَ دستا کپتگ، اے حال بازیں جاگھاں الّم کنگا رند، راستے منّگ بیگا اِنت۔ جاوید رند اِمبری 10 ستمبرءَ ماں حب شپءِ کلاک 9ءَ شہ وتی انٹرنٹءِ دکانا دستگیر کنگ بیتگ اَنت۔ ھما روچا، 6 کلاک ساریا، عبدالصمد تگرانی شہ زاھد میڈیکل سنٹرءِ دیما چاریگاں گپتگ ات۔ عبدالصمد تگرانیءِ ٹپ ٹوریں جسد پرندوشی مردمانی دستا کپتگ ات۔

پہ جمھوری رواجءِ برجاہ دارگا پاکستانی سیاستکارانی گرانبھائیں پندل۔ چمشانک: ولید گربنی

پاکستانءِ جوڑ بیگا 62 سالانی پرگوَزگا رند انگت ملکءِ تھا جمھوری راھبندءِ رواج دیگا ملکءِ سیاستکار سوبین نہ بیتگ اَنت۔ شہ سال 2002ءَ دیم پہ انگو فوج و سیاستکارانی ھواردستیءِ برکتا انگت اعلانیہ فوجی رواج پاکستانءَ لاگو نہ بیتگ۔ ملکءِ سیاستکارانی کاری راھبند ھم سر ظاھرا بدل بیتگ۔ نوکیں راھبندءِ ھمردیا پھکیں سیاسی گل جھدا اَنت کہ گوں یکادگرا انچو گِر چیل مہ بی اَنت کہ فوجی رواج لاگو کنگءِ نیمونے فوجا بہ رسیت۔

صبا دشتیاری مکملیں قومی لیڈرے أت۔ چمشانک: ولید گربنی

بلوچستانءَ لیڈر باز أنت. یکـّے لبزانکی، دگرے سیاسی و دگرےءَ شاعری کتگ و ھمے پڑاں نامدار بیتگ أنت۔ إے جھدکارانی نیاما أگر چارگ بہ بیت، گڈا إیوکا صبا دشتیاری یک ھنچیں لیڈرے ظاھر بیت إنت کہ آئیا مردم سرجمیں قومی لیڈرے گشت کنت۔ پرچاکہ کہ پہ یک قومےءِ دیمروییا سرجمیں ضروری تکاں إیوکا صبا دشتیاریءَ دلگوش گوَر کتگ، و عملی جھد ئی کتگ۔

إے ضروری تکانی نیاما سیاست، سائنسی علما دیما برگ و نوجواناں آئیءِ نیمگا سکین دیگ، بلوچی زبانءِ جیڑواں مارگ و إیشانی ٹھینگا سائنسی راھبندےءَ جھد کنگ۔ بلوچی مڈیاں شہ گار بیگا رکـّینگءِ مقصدا 'ڈیڈا' جوڑ کنگ۔ قومءِ تاریخءَ دربرگءِ مقصدا یا پیسری جھد و دستگٹیاں نوکیں نسلءِ دستا سر کنگءِ مقصدا کتابجاہ جوڑ کنگ لھتے شہ صبا دشتیاریءِ بنی جھدان أنت۔

وتی جھدا دیما برانا آئیا بازیں مارشت نوکیں نسلءِ توکا ودی کتگ۔ قربانی دیگءِ مارشت، وتی جھدا پکـّا بیگ و گٹـّانی سببا وتی منزلا نہ مٹـّینگءِ مارشت، ھر گاما پہ مقصد إیر کنگءِ مارشت و سیاہ، إسپیت، میر و دھقانءِ جاگھا بلوچ بیگءِ مارشت آئیا نوکیں نسلءِ دلاں ردوم دات أنت۔

ھما ھنداں کہ صبا دشتیاریءِ پاد کپتگ أنت، اودا بلوچی زبانءِ چراغ بلینگ بیتگ۔ براھویءِ دیما برگا هم صباءَ دست ھور کتگ۔ آئیا بلوچستانءِ زبان بلوچستانءِ میراث زانتگ أنت و سرپد بیتگ کہ ھچ قوم بے زبانےءَ قومے بیت نہ کنت۔ و یک قومےءِ رکـّینگا آئیءِ زبانا رکـّینگ پکاری إنت۔

سر ظاھرا صبا دشتیاریءِ جھدا مردم گيشتر لبزانکءِ پڑا گندیت۔ إیوکا شہ سال 2004 دیم پہ إنگو بلوچستانءِ سرا پاکستانی فوجءِ یورشءِ خلافا بلوچ نوجوانانی سکین دیگا ظاھر إنت۔ مردماں ماتیں گلزمینءِ رکـّینگا تـکشگءِ سوجا دات۔ سکین دیگا ظاھر إنت کہ دشمنانی دیما گوں قلم، گوں تفنگ و تھروزی بہ دار أنت، پہ قومءِ بانداتا شخصی سیتاں قربان بہ کن أنت، شہ مرگا مہ ترس أنت و شہ سیت پرستیں سردار و نوابانی چنگلاں بلوچ قوما بہ رکـّین أنت۔

پـُژدرءِ راستی إیش إنت کہ صبا دشتیاریءَ سالاں سال ساری گشتگ " بنی آدمءِ جھد مدام گوں رژنءَ ھمگرنج إنت۔ رژن دارگی چیزے نہ إنت۔ ایشی تھاریءِ جگران سندیت و آئیا بیگواہ کنت۔"

صبا دشتیاریءَ نبیستگ "راج دشمنیں سرکار و حاکمانی خیالا آ گوں وتی بمب و توپاں راستیا إیرجیگ کن أنت۔ آواں زانگ لوٹیت کہ راستیءِ محکمیں باسکان بمب، تمپ و دوارسوچیں تیر پروشت نہ کن أنت. بلوچ شھیداں پہ وطنءِ لجـّا خونانی ھما چراغ بلینتگ کہ آ مرچی بلوچستانءِ ماتکوہ و ترشتیں تلارانی برزیں چیدگانی سرا پہ وطن دوست و سرمچارانی راھشونیا روشن أنت۔"
نقل قول: بے تواریء دریا تاکدیم 73

إشتاپی کاراں پاد پلاراں مانگيش أنت: ولید گربنی

مغربی بلوچستانءِ سیاسی حقانی جھدا گلائیشیں 'حزب مردم بلوچستان'ءَ یک حالے داتگ کہ مغربی بلوچستانءِ ورنا وت ماں وتی بحثانی تھا ھمے مارگا أنت کہ پہ قومی حقانی پچگرگا 'مدنی' کار بہ بیت و سیاسی گلاں ھؤر بہ بنت۔ ھمے حالا شہ ورنایاں نقل قول کنگ بیتگ کہ حزب مردم ورنایانی دلدوستریں سیاسی گل إنت!

دنیاءِ ھر زندگیں قوم وتی سرا بیوکیں زوراکیانی دیر کنگا تچ تاچ کنت۔ إے مقصدا جھد کنوکانی توکا ورنا دیما بیتگ أنت و أنگت ھست أنت۔ منظمیں جھدا بلوچستانءِ ورنایانی واھوک بیگ شرّیں مستاگے إنت۔ ألبت سرپدیں مردمانی خیالا ھنـّی دنیا چارگا إنت کہ بانداتگیں روچا إیران چے کنت، إیرانی واکدار کجا بیڑ بر أنت و چنچو کس دستگیر کن أنت یا کش أنت۔ چشیں وھدےءَ بلوچ ورنایانی مارشتاں شورینگ بے عقلیں کارے إنت۔

بلوچءِ سرا مشکلیں وھد آتکگ۔ إے وھد ھنـّی وتی روچاں گوں ٹِکـّارینگ گوازینگا إنت۔ ھما قربانییے کہ بلوچ قوما دیگی بیتگ؛ داتگ ئی۔ جانی قربانی، مالی قربانی، بزگی، نیزگاری، بے وانگی، بے دوادرمانی و وتی سرڈگارءِ سرا درپدریءِ روچ بلوچ قوما ھنچیں وھداں گوازینتگ أنت کہ دگہ قوم وتی عیش عشرتاں بیتگ أنت۔ پھکاں نشتہ سیل چارتگ۔ آواں بلوچانی بزگیءِ سرا اُفــّارگے نہ جتگ، نے کہ ترنپے أرس إش رتکگ۔ نیں کہ عیاشانی کار گٹ أنت، بلوچءِ کوپگا تفنگا إیر کنگ و تیر جنگا واھوک أنت۔ ضروری إنت کہ بلوچ سرپد بہ بنت و پہ دگراں سنگر مہ بنت نے کہ وتی سرڈگارا پہ چشیں کارے کارمرز کنگءِ إجازت بہ دی أنت۔

ملک و قومءِ نگیگانی غمیگ کتگيں نوجوانی سرکچ دیگ سیاسی گلانی ذمواری إنت۔ تانکہ ھمے نوجوانانی وھد وانگ و زانگا بہ گوزیت و پہ بانداتا ملک و قومءِ نگیگیانی دیر کنگا شر تریں وڑےءَ گولائیش بیت بہ کن أنت۔ گوں إشتاپ و سرترپلیں بیانانی شنگ کنگا سیاسی گل وتی جندا سبک کن أنت و بلوچ جواناں بے مقصدا دلسیاہ کن أنت۔

حزب مردم بہ بیت یا دگہ گلے إیشانی ذمواری إنت کہ میانملکی بنجاھانی دیما بلوچءِ مشکلاں گوں علمی دلیل پیش بہ کن أنت۔ پرچاکہ مرچی أگر یک کردے دستگیر بہ بیت، عربے یا آذری مردمے گڈا ما گندیں دنیاءِ دیما یک سیاسی جھدکارےءِ حسابا ظاھر کنگ بیت إنت۔ میانملکی سیاسی و إنسانی حقانی پانکجنیں گل سیاسی 'فعالے'ءِ حسابا آئیءِ پانکجنیا کن أنت۔ ألبت بلوچستانءِ جوان و یا کماش أگر دستگیر بنت، إیش نشوی درمانءِ سوداگر ظاھر کنگ بنت یا کٹریں سنـّی۔ ھمے ناما بازیں بلوچ کشگ بیتگ، بلے یکـّےءِ گؤشا مورےءَ ھم نہ وارتگ۔

بازیں مردمانی خیالا حزب مردم پہ واکداریءِ کرسیا سربیگا سک إشتاپ کنگا إنت۔ گوں إے إشتاپیا إے گلءِ جھدکار وتی پاداں پلاراں مانگیشین أنت و مفتا بلوچ جواناں دلسیاہ کن أنت۔ بلوچ نوجواناں سرپد بیگ لوٹیت کہ إیرانءِ واکدار سُھر بہ بنت، سبز و نیل؛ بلوچانی قسمتا مٹـّینوک آ وت أنت۔ و بلوچءِ بھت إیوکا گون زانت و سرپدی ٹگلینگ بیت کنت۔ نے کہ گوں سر وتیں جنگ و چؤپ۔

زبان و سرڈگارءِ وڑا بلوچی دود ربیدگ گوں خطراں دیم پہ دیم انت: ولید گربنی

بلوچ دودربیدگ دنیاءِ کوّاساں یکـّے شہ کوَھنتریں دودربیدگاں ظاھر کتگ۔ پہ مثال 'اتنولوگ' نامیں کتابے کہ دنیاءِ پجّار ئی درجہ بندی کتگ، ایشیءِ 16 می چاپا بلوچی پجّار کہ مزنتریں نشانی ئی بلوچی زبان انت 97 می درجہ داتگ۔ ھزارانی زبان و کلچرانی تھا بلوچیءَ 97 می درجہ رسگ یک برزیں مقامے انت و پیئشداریت کہ بلوچ یک کوھنیں دودربیدگےءِ واھند انت۔

اگر بلوچ وت وتی چاگردا چماں شانگ بہ دی انت، گڈا ودی بیت کہ بلوچءِ قولءِ پایداری، بلوچءِ میارجلـّی، بلوچءِ مھمانداری، بلوچءِ سیر سانگ و یا هشر مدد و گڈ بجاری بلوچءِ کوھنیں دود انت کہ بلوچ دود ربیدگءِ سراگاھیا شون دی انت۔ گوں اے وڑیں دوداں کوّاس بلوچانی پجـّاراں گوں بیست یکـّمی قرنءِ ضرورتان ھمرد منّ انت۔ البت بلوچان سرپد بیگ لوٹیت کہ مرچییں دورءِ بدلیاں بلوچ دود ربیدگ پلگاریا نہ اشتگ و ایشیءِ تھا کشی رسم پترتگ انت۔

چدا پیسر بلوچستانءِ سرڈگارءِ طبیعی و جغرافیائی ھندا بلوچ کمک کتگ انت کہ آ وتی زبان و دودربیدگا شہ ڈنی اثراں بہ رکـّین انت۔ پیسری دئورا کہ مردمانی ضرورت کشت کشار و مالداری بیتگ انت، مردم شہ مشرق آتکگ دیم پہ مغربءَ شتگ ات یا شہ مغرب آتکگ دیم پہ سند شتگ انت۔ هما ھنداں شتگ انت که آپ باز بیتگ، زمین ھم پہ کشت کشارا بروبر بیتگ۔ ھموداں مردماں مال چارینتگ انت و کشت کشار اش کتگ۔ تاھاپ و کوھستگیں بلوچستان پہ آواں ایوکا یک راھے بیتگ کہ شہ اودا گوستگ انت۔

نیں دنیاءِ مردمی آبادیءِ ردومءِ سببا ملکانی ضرورت ایوکا گوں کشت کشار و دلوت رودینگا پیلو نہ بیگا انت، آ پہ دگہ آسراتیانی درگیجگا درکپتگ انت۔ پمیشا بلوچستانءَ ھرید آرتگ۔ بلوچستانءِ معدن بہ بنت یا ایشیءِ زربار و سرڈگارءِ پراھی؛ پہ شدیگیں ملکاں شرّیں سیاسی و معیشتی آسراتی انت۔ ھمے سببا شہ ایرانءَ فارس، شہ پاکستانءَ پنجابی، مھاجر و پٹان، و شہ افغانستانءَ پٹان و دگہ افغان ھیلگر بیتگ انت۔ ایشانی کشا میڈیاءِ ردوم و درامدیں دودربیدگ، سیاست و لبرانکی تبلیغاں بلوچ سرڈگار، زبان و دودربیدگ وتی انگرّا کتگ انت۔ ھمیشانی کارپد بلوچ دود ربیدگءِ تھا ظاھر انت؛ ما گندیں کہ لھتے جاگھاں دوچاپیءِ جاگہ 'ڈانڈیا'ءَ گپتگ۔ اے حسابا بلوچ دودربیدگ ھما وڑا کہ سرڈگار و زبان انت، گوں کوردیمیں خطراں گر چیل انت۔

اے حالتاں پہ وتی پجّار؛ زبان، سرڈگار و دودربیدگءِ رکـّینگا بلوچ سرکلءِ ھر توجیل لایق ستا انت و باید اے رستگاری گامگیجاں بلوچ مردم وتی ھَوبَتا کمک بہ کن انت۔ اگر کمک کنگءِ توان مہ بیت، کما شہ کمتر دلپرؤش اش مہ کن انت۔

داکٹر الـّہ نظرءَ شہ بلوچستانءَ در کن ات -شونگال

بلوچستانءِ آزادی لوٹوکیں جنزءِ نوکیں راھدربراں بلوچ راجا یک نوکیں مارشتے دات۔ ایشانی فلسفہءِ رندگیریا بازیں بلوچ ورنایاں وتی جان ندر کت انت و دگہ بازینے انگت پہ بلوچستانءِ آزادیا وتی نایافتیں سراں قربان کنگا اوشتاتگ انت۔ نوک سرکشـّوکیں راھشونانی نیاما میر خیربیار مری، میر براھمدغ بگٹی و داکٹر الـّہ نظرءِ نام گچینی انت۔ ایشانی نیاما داکٹر الـّہ نظر وانندہ تر و سیاسی پڑا کوّاس تر زانگ بیت انت۔ البت ٹکـّی سروکانی اوبادگ بیگءِ سببا میر خیر بیار و میر براھمدغ بگٹیءِ توار برزتر جکـّستگ انت۔

ھنچؤش کہ دنیاءِ راجی جنزانی دیما برگا راھدربرانی جانسلامتی ضروری بیتگ، ھمے وڑا بلوچ راجی جنزا پہ منزلا سر کنگءِ مقصدا راجی جھدکارانی رکـّینگ ضروری مارگ بیگا انت۔ اے ردا شہ پاکستانءِ چنگلاں میر خیر بیار مری و میر براھمدغءِ رکـّگ و ماں یورپی ملکاں ایشانی پناہءِ لوٹگا بلوچ و بلوچانی دوستواہ دیمرویءِ شرّیں مستاگے منّگا انت۔ نیں کہ ایش شہ بلوچستانءَ درکپتگ و پاکستانی چاریگ سر بتگ بیتگ انت و پاکستان وتی سرجمیں آسراتیاں پہ داکٹر الّہ نظرءِ کشگ و یا دستگیر کنگا کار بندگا انت۔

داکٹر الّہ نظرءِ زوالی بلوچستانءِ راجی جنزا سک باز تاوانبار وا کنت، ایشیءِ کشا بلوچستانءَ پدمنتگیءِ کوھنیں کورچاتا دئور دات۔ پمیشا ھر بلوچءِ ذمواری انت کہ بلوچستانءِ اے سیاسی راهدربرا شہ در بہ کن انت و آئیا ماں یک انساندوستیں ملکے برسین انت۔ مرچی کہ رسانکی آسراتیانی برکتا جھان یک کلـّگے جوڑ بیتگ، شہ دیناءِ کجا یک ملکےءَ داکٹر الـّہ نظر وتی قوما راھشنونی کنگا تکش ات کنت۔ البت پاکستانءِ کش گوراں نندگ پہ آئیا مزنیں خطرے انت۔ چاریگ آئیا جن انت و میارا وت براتانی سرا لڈ ّ انت۔ ھنچوش کہ ھنـّی بازیں آزادی لوٹوکیں جھدکارشہ آزادیءِ جنزا گسر کنگ و گاریں مردمانی شوھازا راھی کنگ بیتگ انت۔ الہّ نظرءِ زوال کنگا پد ھمے وڑا پشت کپتگیں آزادی لوٹوکاں شہ بنی راھا گسر و گوں یکـّا دگر گٹگیر کنائین انت۔

عملی جھد إیوکا سلاحبندیں جھد نہ إنت۔ چمشانک: ولید گربنی

بلوچستانءِ حالاں وانوک ھر روچ اشکن أنت کہ بازیں حالتاکی بیان دیوک عملی جھدءِ گپا کن أنت و لھتے جھدکاراں ڈوبار أنت کہ آ عملی جھدا ھمراہ نہ انت۔ إے وڑیں بیان دیوکانی نیاما گيئشتر عملی جھدا سلاحبندیں جنگ لیک أنت۔ بزاں ھما کس کہ تفنگ إش کؤپگا نہ إنت، عملی جھدکار منـّگ نہ بیگا أنت۔ وھدے کہ منا میر غلامحسین بلوچءِ سرجم کتگیں زرّانی و ألکاپیں ڈکــّاں آوانی خرچ بیگءِ حال رس إت، گڈا ترانگ کپتاں کہ عملی جھدا پہ لھتے وانوکاں سرکچ بہ دیاں۔

زی و مرچییں زمانگاں چارگا پد ودی بیت إنت کہ بازیں کس عملی جھد کنگا دستگٹ بیتگ أنت۔ إیشانی عملی جھدءِ ثمر پہ قومءِ بانداتا پہ بلوچستانءِ آزادیا سلاحبندیں جنگولانی جھدءِ وڑا سوبمند أنت۔ پہ درور لھتے جھدکارانی دستگٹیان بیان کنگ ضروری إنت۔

سید ظھور شاہ ھاشمی

سید ھاشمی بلوچی زبانا بنیسگءِ نوکیں راھبندءِ پت یا جوڑ کنوک منـّگ بیتگ۔ آئی بُندرا یک شاعرے أت۔ وھدے کہ راڈیو کراچیءَ آئیا کار بندات کت، گڈا مار إتی کہ پہ 'بروڈکاسٹ' کنگا بلوچی سیاھگ، شعر و داستان نیست إنت یا إیش کہ کموک أنت۔ إے پڑا آئیا جھد کت کہ وت بہ نبیسیت و نبشتانکاں تالان بہ کنت۔ ھمے جھدا پہ زبانءِ نبیسگا راھبندے ٹھینگءِ نیمگا آئیا سِکین رس إت۔ ھمے سکینءِ ثمر 'بلوچی سیاھگءِ راست نبیسگ' کتابءِ دروشما بادے مرچی نبیسوکاں راھشونی کنگا إنت۔

وھدے کہ ظھور شاہءَ وتی جھد بنا کت، مردماں آئی إیراز کپت، میاریگ إش کت کہ سیاسی باور ئی گوں آزادی لوٹوکانی باوراں ھمرد نہ أنت۔ لھتے کساں آئیا پاکستان پیپلز پارٹیءِ مردم گشت۔ پمیشا گوں آئی إش ھؤر کاری نہ کت و یا کمک إش نہ کت۔ کاروانءِ وڑا سید ھاشمیءَ وتی راہ گپت و دیما رواں بیت۔ وتی جھدءِ منزلا سر بیت و مرچی آئیءِ شعر و سیاھگ شون دیگا أنت کہ آئیءِ عملی جھد ھداروکی نہ بیتگ۔ آئیا دیر چارتگ و دیر چاریءِ ثمرا مرچی قوم چَشگا إنت۔

عبدالواحد بندیگ

عبدالواحد بندیگ بلوچی زبانءِ دوستواھے إنت۔ آئی نے سیاست کارے، نے کہ ندکارے۔ إیوکا گوں بلوچی زبانا دوستی ئی ھست۔ ھمے دوستی آئیا گوں عمل پیشداشتگ۔ مھتاک 'بلوچی'ءِ شونکارےءِ حسابا بندیگءَ شہ 25 سالا گيئش انت کہ زبانءِ خدمتا اوشتاتگ۔ بلوچی زبانءِ تاکبندانی خریدار إنچو نہ أنت کہ کسے إیشانی شنگ کنگا وتی روزگار جوڑ بہ کنت۔ پدا ھم بے زرّی سببا عبدالواحد بندیگ شہ وتی عملی جھدا پد نہ کنزتگ و بادے مرچی تاکبندا وڑے نہ وڑے شنگ کنگا إنت۔ عبدالواحد بندیگ عملی جھدءِ یک زندگیں مثالے إنت۔

صبا دشتیاری

صبا دشتیاری سید ھاشمیءِ شیدایے إنت و عبدالواحد بندیگءِ ھؤرکارے بیتگ۔ آئیا ھم مارتگ کہ قوم بے زبانا قومے پشت نہ کپیت۔ قوم مرچی پادمال بہ بیت، لٹ بہ وارت، شد لاپ و بے روزگار بہ بیت۔ أگر زبان ئی زندگ بہ بیت، باندا جاہ جنت و دیناءِ دیما وتا منـّینیت۔ ألبت أگر زبان ئی گار بہ بیت۔ گڈا آئی گورا پہ وتی منـّینگا ھچ پشت نہ کپیت؛ دگہ قومانی مُجـا بیگواہ بیت إنت۔

گوں بازیں سیاھگ، آزمانگ و لچّوانی نبیسگا و دگہ ندکارانی صداں سیاھگاں سرجم کنگ و کتابانی دروشما شنگ کنگءِ عملی جھدا صبا دشتیاری بلوچستانءِ زنڈتریں جھدکارانی رما رسینتگ۔ گون سید ھاشمی أکاڈمی ھؤر بیگ و سید گنجءَ سرجم کنگا پد شنگ کنگءِ کارا گيشینگا ھمدستی عملی جھدءِ روشنائیں درورے إنت۔

مرچییں روچا 'سید ھاشمی ریفرنس کتابجاہ' بلوچستانءِ مزنتریں کتابجاہ إنت۔ چدا پیسر ھچ بلوچ فلاسفر، سیاستکار و یا پرگنگی سرکارا چشیں بلاھیں کار نہ کتگ۔ بادے مرچی ھم دگہ مثالے نہ گواھیت۔ إنچوکیں گرانبھا و بے دروریں کارا گيشینگءِ پڑا صبا دشتیاریءَ سرجمیں بلوچستان گولتگ و پنڈ سنڈ ئی کتگ۔ بازیں کساں آئی ڈالچار کتگ و ھمے گشتگ إش کہ 'بلوچستانءِ أصلی جیڑہ کتابجاھے ٹھینگ نہ إنت؛ بلوچستانءِ آزادی إنت'۔ ألبت إے گپاں صبا دشتیاری دلپروش نہ کتگ۔ آخر سرا وتی کار ئی پہ منزلا رسینتگ۔

أنور ساجدی

أنور ساجدی یک حالکارے إنت۔ آئیا پہ پاکستانی 'جنگ' حالتاکا کار کت۔ سالاں سال کار کنگا پد ھمے مار إتی کہ بلوچاں زبانے نیست۔ بلوچانی جھد، بلوچانی خبر، بلوچانی پریات و بلوچانی سرا بیوکیں زوراکی بے گوانکو أنت۔ بلوچانی مارشتاں ترجمانی کنوکیں ھچ حالتاک نیست إنت۔ پمیشا ضرورت إنت کہ إے پڑا کارے بہ بیت۔ گوں ھمے مارشتا أنور ساجدی'ءَ روچتاک 'إنتخاب' سال 1988ءَ بندات کت۔

گوں روچتاک إنتخابءِ شنگ کنگا أنور ساجدی پیشداشت کہ إیشی إیوکا پہ لاپءِ سیر کنگا نہ إنت۔ آئیا شہ أولی روچا بلوچ و بلوچستانءِ جیڑہ گيئشا شہ گيئشتر دیما آرت أنت۔ بلوچانی گنگیءِ زبان جوڑ بیت۔ دگہ قوماں بلوچانی خبراں رسینگءِ کشا کشا بلوچ قومءِ نیاما إنتخاب یک رابطوے جوڑ بیت۔ إیشیا أبید أنور ساجدی پہ دگہ بلوچ حالکاراں یک سکـینے بیت۔ دیر نہ گوَست کہ ما دگہ بازیں حالتاک سر کشـّگا دیست أنت۔ عملی جھدءِ ھمے سانڈیں مثالا مرچی لھتے کس ڈوبارگا أنت و آئیا بازیں میار لڈ ّگا أنت۔ پرچاکہ تفنگ ئی بڈ ّا نہ إنت۔

مرچی بلوچستانءَ عملی جھد کنوکانی لڑ دراجتر بیتگ۔ لبزانکءِ پڑا، وانگ زانگءِ پڑا، حالکاری و رسانکءِ پڑا، چاگردی پدمنتگیانی خلافا و نیزگارانی کمکءِ پڑا جھد بیگا إنت تانکہ بلوچ قوما یک علمی تشریحے بہ رسیت۔ إے پڑا جھد کنوکیں مردمانی قربانی شہ آواں کہ جنگءِ پڑا شھید بنت، کمتر نہ إنت۔ فرق إیش إنت کہ جنگءِ پڑا شھید بیوکیں مردمانی ھمّت پہ بانداتگیں جنگولاں شرّیں درور أنت۔ إیش زندگ أنت و وتی کاراں وت دیما بران کن أنت۔

إے سیاھگا نبیسگءِ وھدا منا شھید مھرنھاد، سنگ أکاڈمیءِ داکٹر شاہ محمد مری، بلوچی لبزانکءِ غلام فاروق بلوچ، داکٹرعبدالستار دوشوکی، 'وش' ٹلوژن، ماسٹر عبدالمجید گوادری و دگہ لھتے کس کہ نامانی نہ گر إش مصلحت إنت؛ یکـّوئی یاد آتکگ أنت۔ إیشانی سبباں وانوک وت بہ زان أنت۔ پرچاکہ پہ من حساب جنگ گران إنت۔

بلوچی زبانءِ ندکار گار انت: ولید گربنی

بلوچی زبانءِ ڈالچار کنگءِ سببا مدام سرکاری واک میابار کنگ بیتگ انت۔ انگت ماتی زبانانی ڈالچار کنگا پاکستان و ایرانءِ سرکارانی کرد برجاہ انت۔ البت نیں کہ ٹکنالوجیءَ دیمروی کتگ، ھر دومی بلوچ ندکارءِ لوگا کمپیوٹر ھست انت و ھر سئمی ندکار یک ویبجاہ یا ویبتاکےءِ واھند انت؛ پدا ھم مردم بلوچی زبانا سیاھگے نہ گندیت۔

بلوچی ندکارانی ذمواری انت کہ آ وتی زبانا ردوم دیگءِ مقصدا گيئشا شہ گيئشتر بلوچی بہ نبیس انت۔ تانکہ بلوچی ردوم بہ کنت۔

ھمے ردا ما واجہ عبدالقادر بلوچءَ ستا دییں کہ آئیا وتی نامداریں فارسی بلاگءِ کشا بلوچی بلاگے جوڑ کتگ و بلوچی خبر و تبصرہ نبیسگ و تالان کنگا انت۔ باید واجہءِ اے جھد پہ دگہ بلوچاں سکـینے بیت انت و بلوچی زبانءِ دیمرویءِ جھدا آدگہ ھم ھمراہ بہ بنت۔

بلوچی میزراں و بلوچستان آباد بات۔

تاریخ پدا چھر نہ وارت۔ چمشانک: ولید گربنی

بلوچستانءِ تاریخءَ شہ سوبینیاں گيئشتر ردی مان انت۔ پمیشا بلوچستانءِ مردم مدام زوراکیانی آماچ انت و بلوچ جھدکار مدام قربانی دیگا انت۔ البت نیں وھد بدل بیتگ و بدل بیتگیں وھد بلوچاں پدا رد ورگا نہ الـّیت۔

مئے تاریخءِ مزنتریں ردی چاکر و گوھرامءِ جنگ انت کہ آئیا ھزارانی حسابا بلوچ کوشارینت انت۔ دومی مزنیں ردی اسلامءِ ناما قلاتءِ خانءَ کت کہ مکرانءِ زگریانی 'قتل عام' ئی کت۔ ادا ھم دھاں ھزار بلوچ زوال بیت انت۔

یک دگہ ردییے 1947ءِ کش گوراں بیت کہ قلاتءِ دگہ خانےءَ پاکستانءِ جوڑ کنگا کمک دات. پدا پاکستانی پندلانی آماچ بیت و پاکستانءَ بلوچستان آوار جت۔ رندا وت خان یک کاسگچٹـّیں گورنرےءِ حسابا پاکستانءِ غلام بیت۔

چدا پد میر غوثبخش بزنجوءَ بلوچستانءِ لھتے سردار و نواب سیاستءِ پڑا آرت انت و بلوچستانءِ پرگِنگی حیثیتءِ منـّائینگا رند بیوکیں گچینکاریاں ھمے سردار ئی سیاسی ذمواری دات انت؛ تانکہ بلوچ یک الکاپیں قومےءِ دروشما پيئشکنزاں بہ کنت۔ 1970ءِ دھرءِ اے سوبینی سردار عطاءُاللہ مینگلءَ گوں جام غلامقادر وتی ھستیں دشمنیءِ ھرجاں دات۔

رندی ردی بی ان وائی ام نامیں گلےءَ سرجم بیتگیں نوک گـُلگ و نیلگ سریں جواناں کت۔ ایشاں گوں لھتے سردار و نواباں تپاکییے جوڑ کت و میر غوثبخش بزنجوءِ سیاسی جھد گوں خاکاں ھؤر کت انت۔

نیں پدا ھمے وڑیں کشکےءَ بلوچ برگ بیگا انت۔ البت اے رندی بلوچ رد دیگ نہ بی انت و تاریخءَ پہ چھر ورنگا نہ الّ انت۔ پرچاکہ چدا پیسر بلوچانی گوانکو پاکستانی حالتاک بیتگ انت کہ آواں بلوچ جھدءِ اصلی حال و بلوچ زانوگرانی راھشونی پہ مردماں نہ رسینتگ انت۔

نیں بلوچ میڈیاءِ واھوند انت۔ و بلوچ میڈیا گوں عاقلی جھدءِ ترجمانیا کنگا گولائیش انت۔ ھما جاگھاں کہ نزوری ھست انت، گوں وھدءِ گوزگا شہ نزوریاں مردم درس گر انت و راھا تچک کن انت۔

ناگمانءِ گواچن: بلوچ چرتی نھر بہ کنت

ناگمان مدام 'گواچن' سرحالا کسانیں بلے نقدیں تران نبیسیت۔ اے رندی ناگمانءَ نبیستگ:

غلام محمدءَ بہ گر داں علی شیر کردءَ؛ پاکستانءَ بازیں بلوچ چست کتگ انت و پدا آوانی جون دستا کپتگ انت۔ چیزے مدت انت کہ دشمنا وتی (زوراکیءِ) راھنبد مٹینتگ۔ ھنی آ چست کنت بارت و چیزے روچا رند جون رس انت۔

منی خیالا ایشیءِ جوابا بلوچاں ھما وڑا کنگ لوٹیت کہ جواھر لال نھروءَ سوج داتگ۔ نھرو گشیت "آجوئیءِ جنگ چرتءِ وڑا مڑگ لوٹیت۔ چرت ظاھر نہ بیت، بلے آئیء کرینژوکیں آواز گؤشاں کرّ کنت"۔

طالبان ھمے وڑا کنگا انت۔ آواں سربرا گلے نیست انت، بلے چیرکائی جنگا انت۔

منی خیالا وھد آتکگ کہ بلوچ 'نھروءِ چرت'ءِ رپکا بہ زیر انت۔ چیاکہ بی اس او –آزادءَ ابید سربرءِ آزادی پسندیں گلانی چشیں کردے پشت نہ کپتگ۔

دلگوش: برزا داتگیں سیاھگ روچتاک 'توار'ءِ بلوچی تکا جمعہ 1 اکتوبر 2010ءَ شنگ بیتگ۔ پہ واناکتر کنگءِ مقصدا بلوچی نیوزءَ لھتے گال، گالبند و نبیسگءِ راھبند ٹگلینتگ انت۔

......

تبصرہ: ولید گربنی

ناگمانءِ اے کسانیں سیاھگا بازیں خبر ظاھر کتگ انت کہ چارگ و سرکچ ورگ اش پکار انت۔

منی خیالا ناگمانءَ گوں اے خبرانی ظاھر کنگا دلیری کتگ۔ پہ ایشی ناگمان شاباشی دیگ لوٹیت۔ زانگ بیگا انت کہ نیں ناگمانءَ وتی ھؤشءِ کارمرزی بنا کتگ۔

آئیءِ پیسری 'گواچنانی' وانگا وا بازیں کس سربتگ کتہ بیتگ انت۔ مردم حیران بیتگ انت کہ ناگمانءِ وڑیں وانندویں مردمے چونکا غیر علمی خبر نبیسیت و پہ تالان کنگا تاکبند و مھتاکانی سرا دیم اش دات۔

نیں کہ ھؤشا کاربندگا انت، امید انت کہ مردم ناگمانءِ ھمے 'گواچنا' جهدکار وتی چادرءِ لمبا بند انت و مدام وتی جھدءِ ھمراہ ئی کن انت۔

من مدام شمالی آئرلنڈءِ آزادیءِ جھدءِ مثال داتگ و ھمے گشتگ کہ بلوچ پارلمنٹاں بہ رو انت، اسٹبلشمنٹاں ھؤر بہ بنت و اگر موہ دیگ بیت انت؛ زندءِ آدگہ تکاں گوں دشمناں ھمراہ و ھمدیوان بہ بنت۔ (ترانگ بہ کپ ات کہ ناگمانءِ جند سرکاری ملازم و پگار وارے انت۔) اے راھا دشمناں شرتر پجّا کار انت۔

من وا اے وھدی سلاحبندیں جنگءِ خلافایاں۔ منی خیالا ھنـّی سلاحبندیں جنگ ھر نیمگا بیگا انت و زوراکیءِ آماچیں ھزاراں مردمانی چیھال ھچ کسءِ گوشا نہ کپگا انت۔ دردءِ آماچیں مردم ھنچونائیا نہ چاریت کہ آئیءِ کوکـّارا اشکنوک نیست پمیشا کوکـّار مہ کنت، بلے سلاحبندیں جھدءِ مھار مردمانی دستا انت کہ آ وھدا گچیں بہ کن انت۔

پدا ھم پہ بلوچستانء آزادیا سیاسی جھد کنگءِ بدلا لھتے بلوچ تفگاں کارمرز کنگ بہ لوٹ انت، گڈا ضروری نہ انت کہ سیاسی، لبزانکی و چاگردی جھدکار کراچی، لاھور و اسلام آبادءِ دگاں در بہ کپ انت و آواں زندہ باد بہ گش انت۔ ایشیا ھچ عقل قبول نہ کنت۔

پہ سیاسی، چاگردی، لبزانکی و دگہ قومدوستیں جھدکاراں سلاحبندیں جھدکارانی پلانگریا ھمنچوک گشگ بس انت کہ جنگول میاریگ کنگ نہ بی انت۔ پرچاکہ پاکستان و ایران بلوچانی سرا ناروائی کن انت۔ سلاحبندیں مردم ناروائیانی جوابا گوں تفنگ دیگ لوٹ انت۔ اے کشک ھماوانی وتیگ انت، سیاسی گلانی نہ انت۔

ھنچوش کہ ھنی بیگا انت؛ رد بیگا انت۔ ھنـّی ھر زھگءِ دیما پاشک کنگ بیتگ کہ بی ال افءِ سروک کئے انت، بی ال اےءَ کئے راھشونی کنت و بی آر اےءِ کارانی منصوبہ بندیاں کئے کنت! اے پھک پہ بلوچستانءِ آزادیءِ جھدا نقصان انت۔

اگر داکٹر اللہ نظر گوں حالکاراں تران کنت و گشیت کہ داکٹر و وکیل سلاحبندیں جھدا ھمراہ انت۔ اے خبر راست بہ بیت یا رد، دشمن ھمے وڑیں بلوچاں وتی زوراکیءِ آماچ کنت۔ سلاحبندیں جھدا زانگ مہ بیت کہ آئیا کئے سروکی کنگا انت و گوں آواں کئے ھمراہ انت۔

پرچا لاپتہ، وھدیکہ چاریگاں گپتگ انت؟ چمشانک: ولید گربنی

ھر روچ بلوچستانءِ حالتاک و حالجاھاں خبر تالان انت کہ شہ فلاں جاگھا پاکستانی چاریگاں یک، دو یا گیشتر بلوچ چست کتگ انت۔ چست کنوکانی باروا گشگ بیت انت کہ ماں گاڑیےءَ سوار بیتگ انت۔ چست کنگ بیتگینانی چم بندگ بیتگ انت۔ چست کنوکاں سلاح گون بیتگ۔ روچ رحمانی یا مردمانی دیم پہ دیما بلوچ چست کنگ بیتگ انت۔

البت وھدے کہ خبرا دو تا سئے روچ گوزیت، گڈا چست کنگءِ حال بدلینگ و گار کنگ جوڑ بیت انت۔ ایشیءِ سبب چے انت؟ باریں چارگ بیتگ کہ چست کنگ بیگ و گار بیگءِ خبرانی فرق چے انت؟ بلوچ جنزءِ سرا ایشانی سیاسی کارپد چے انت؟ سیت و تاوان چے انت؟

گارکنوک ھر کس بیت کنت۔ ٹکـّی دشمنے بیت کنت، دزّے بیت کنت، باجگرے بیت کنت یا کشوکے بیت کنت که کسےءَ کشیت و گیابانےءَ دئور دات۔ بلوچستانءَ و دنیاءِ دگہ کنڈاں باز براں ھنچوشیں کار بیتگ انت۔ ایشانی سیاسی کارپد 'صفر –زیرو' انت۔ ایش اگر شت انت، گڈا شہ وتی کیسگا۔ ھنچوش کہ رحمان ملک یکـّوئی گشیت۔

ھر بلوچے کہ گار بیت، رحمان ملک ایشیا وت ماں وتی جیڑہ، جنکےءِ سرا مڑگ یا باجبری ظاھر کنت۔ گوں ھمے خبرا حالکار ایکیم بی انت۔ میانملکی چاروک ھم خرسند بی انت۔ پرچاکہ آوانی پولکاریءِ کار آسودگ بیت۔

بلوچءِ جندا و ھوش سرا بیگ لوٹیت۔ بلوچ نبا رحمان ملکءِ داما بہ کپیت و ھمائیءِ گپا ماں حالتالاں، وتی مچّی و دیواناں ظاھر بہ کنت۔ بلوچاں سما بیگ لوٹیت کہ وتی سیاسی جھدکاراں گاری ناما مہ دات۔ اغوا و 'لاپتہ' دزّی و ڈنگی خبراں کاینت۔ سیاسی جھدکاراں دزّ و ڈنگانی لڑا دیگ پہ دشمناں فایدہ انت، بلے بلوچاں زیب نہ دات کہ وتی سیاسی بندیگاں بیگواہ بیگءِ ناما بہ دات و آواں ناموران کنگءِ دشمنی کارکردا گوں دشمناں –پہ زانت، یا نزانتی- ھورکار بہ بیت۔

بلوچ وت وا زان انت کہ آوانی جھدکاراں، وانندویں ورنایاں، سیاسی کماشاں، کوّاس و راھشوناں کشوک و تلپیں پڑاں دئور دیوک ابید شہ دشمنیں سرکاری واکداراں دگہ کس نہ انت۔ پمیشا یکـّیں خبرا بہ دار انت، وتی و دنیاءِ مردماں ڈاہ بہ دی انت کہ آوانی مردم گار نہ انت۔ چاریگاں گپتگ انت۔ چاریگانی بندیگجاھاں بندیگ انت۔ لٹ کٹ بیگا انت۔ پدا کشگ و تلپیں پڑاں جسد اش دئور دیگ بی انت۔ ھمے خبرا دنیا بہ زانت۔ ھمے خبر راست انت۔ ھمے خبر پاکستانی و ایرانی واکداران بے واب کت کنت۔ دنیا پیشدارگ بہ بیت کہ ایشانی ملکی قانون ایوکا پہ فارس و پنجابیان انت۔ یا دگہ گچینی ٹولی چؤش کہ کاسک چٹ، مالدار، زمیندار، ملا و سرداران انت۔ پادمالیں بلوچ و دگہ نزوریں قومانی مال ماں اے ملکاں بے میارا دستگیر بیگ، لٹ کٹانی آماچ بیگ، بندیگ و پدا کشگ بیگ انت۔ ھمیشی راستی انت۔ و ھمیشیا بلوچ ظاھر بہ کن انت۔ 'گاریں بلوچ'، 'اغوا بیگ'، 'لاپتہ' و دگہ ھنچوشیں دوزی و ڈنگی گال دستگیر، بندیگ و شھید کنگ بیتگیں بلوچانی جھدا ایرجنگءِ ھمردیں گال انت کہ یلہ دیگ اش ضروری انت۔

شہ بی ان امءَ عصا ظفرءِ اشتاپی درآیگءِ سبب چے انت؟ تبصرہ: ولید گربنی

اردو زبان حالتاکاں حال تالان کتگ کہ بلوچ نشنل موومنٹءِ ھداروکی کماش عصا ظفر گوں سنگتاں شہ گلءِ سروکی و باسکیا در آتکگ۔ عصا ظفرءِ جارا پد دگہ سریں جھدکاراں ھم در آیگءِ جار جتگ۔ ایشانءِ نیاما حالرسانیں منشی قاضی ریحان، حسابدار منشی رحمت اللہ شوھاز، بنجاھی کمیٹیءِ باسک خدا بخش، کامریڈ واحد، فاروق بلوچ، قدراللہ، میجر محمد شبیر نورءِ نام شنگ بیتگ انت۔ گوں حالکاراں ترانءِ وھدا گوں عطا ظفر گلءِ بنجاھی کمیٹیءِ باسک میجر علی محمد ھم نندوک بیتگ و آئیا ھمودا شہ گلءَ درکپگءِ جار جتگ-

چوناھیا عصا ظفرءَ گوں ھمراھاں شہ گلءَ درکپگءِ سبب کاری راھبندءِ سرا اختلاف ظاھر کتگ انت، بلے جاورانی چارگا پد مردما سرپدی رسیت کہ باپشتا دگہ واقعاتاں عصا ظفر شہ گلءَ جدا بیگا مجبور کتگ۔

عصا ظفر و کٹریں نشنلسٹانی نیاما فرق ھما وھدی ظاھر بیت انت کہ غلام محمد بلوچءِ شھادتا پد سردار زادہ اختر مینگل مکرانءِ ترّتابا آتکگ ات۔ ترّتابءِ درگتا اختر مینگلءَ ماں جیوانی و تربت پچین دیوان ھم برجاہ داشتگ اتنت۔ پدا پولیس گارڈانی حفاظتا آئی شھید غلام محمدءِ شھادتا دلپدردی درشان کنگا 'مند'ءَ ھم شتگ ات۔

وھدے کہ اختر مینگلءِ پچین دیوان بیت انت، گڈا بی اس او –آزادءِ جھدکاراں بلوچستانءِ بیرق ماں دیواناں ٹال کتگ اتنت۔ البت مینگل گلءِ سریں جھدکاراں بیرق ٹال بیگا نہ اشتگ اتنت۔ پمیشا بازیں چست ایرے بیتگ ات۔ ماں تربت وا مینگل پارٹیءِ دیوان اش پروشتگ ات۔ و یکـّے شہ بی ان امءِ جھدکاراں مینگل پارٹی والایاں مشت مکونڈ کتگ ات۔

ھمے جاورانی وھدا مینگل پارٹیءِ خلافا بازیں کٹریں نشنلسٹاں حالتاکی بیان ھم داتگ ات۔ گڈا عصا ظفرءَ وتی گلءِ مردم سکین داتگ اتنت کہ مینگل پارٹیءِ خلافا باز اختلاف ظاھر مہ کن انت (اے خبر بلوچی نیوزءِ تھا ھست انت)۔ ایشی ھوران اولی ترمپ ات و وانوک سرپد بیت انت کہ عصا ظفر سیاستا شھید غلام محمد بلوچءِ دیدا چارگا نہ ات۔

پدا ھم بی ان امءَ وتی بنجاھی دیوانا برجاہ دارگ جار جتگ ات۔ دیوانءِ وھدا یک و دو ماہ پشت کپتگ۔ چؤش اشتاپی ھمراھاں یلہ دیگءِ سبب مردماں حیران کنت۔ اے اشتاپی در آیگءِ یکـّیں سبب بیت کنت کہ نشنل پارٹی و بلوچستان نشنل پارٹی –مینگلءِ سیاسی جھدکاراں گچین کنگ و جنگ بیگءِ کارکرداں بازیں کٹریں نشنلسٹ ستا دیگ انت و عصا ظفر و آئیءِ سنگتانی خیالا ایش پہ قومی سیاستا تاوان انت۔ پمیشا کٹرانی ھمراھداری کنگ اش پہ وت گيئگ نہ لیک ات۔

بلوچ قومء پیرسالیں راھدربر و جھانء نظر- چمشانک: ولید گربنی

سرجمیں جھانءَ وھدے مردم کماش بی انت، گڈا آ قول نامداریں بلوچ ندکار واجہ علی رئیسیءَ 'گس منند' بی انت۔ آرام کن انت، ترتابا در کپ انت، سیل سپاہ کن انت۔ سارتیں گواتءِ ورگا سارتیں ملکاں وتی گرماگاں گوازین انت و زمستاناں گرمیں ملکانءِ زرباراں سیاھیں عینکے جن انت، نرمیں کرسیانءِ سرا دراج کش انت و کش ایریں 'ٹیبل'ءِ سرا سارتیں 'فروٹ کوکٹل جوس'ءَ تشے تشے تنگان کن انت۔

بلوچاں زربار وتا ھست، وتی ملک اش وش انت۔ سارت و گرمیں دمگ ھست انت۔ گرماگاں شمالی ھنداں و زمستاناں مشرقی ھنداں گوازینگ وش بیتگ ات، زربارءَ نرمیں ریک ھست انت، قدرتی ندارگ وتی مٹ وت انت و ھر میتگءِ پُشت گوئر یا چیرگورا قدرتی 'پکنک پوئنٹ' گشیگاں واجہ خداءَ پہ بلوچانءِ آسودگیا گوں وتی پاکین دستاں سازتگ انت۔ بلے افسوز کہ دنیاءِ پدمنتگتریں قومانءِ وڑا بلوچ چؤش کہ نیزگارتریں قوماں زند گوازینگا انت۔ بلوچانءِ پیریں تانکہ دیرا زندگ پشت نہ کپ انت، اگر یکـّے پشت کپیت، گڈا تانکہ وتی زندءِ گڈی روچا گوں جیڑواں گرچیلّ بیت۔ شہ جفاکشیں کماشاں بہ گر تانکہ سیاستکاریں کماشاں بلوچ پیرینانءِ گوپگاں مزنیں ذمواری تانکہ زندءِ گڈی روچاں لونجان انت۔

ھمے ذمواریں پیرینانءِ نیاما یکـّے نواب خیربخش مری انت۔ شہ وتی جوانیا کہ ٹکّءِ سرداریءِ بار آئیءِ بڈ ّا بندگ بیتگ دیم پہ انگو بلوچ قومءِ بزگیءِ غماں نواب خیربخش مری جوشـَگا انت۔ مرچی کہ 91 سال عمر انتی قومءِ حقانءِ پانکجنیا کنگا انت و آئیءِ لیکہ شہ ھر دگہ راھدربرا گيئشتر جھدکاراں پسند بیگا انت۔ پمیشا ماں سرا نوابءِ صاحبءِ ساھگءِ ساھیل بیگا بلوچ جھدکار پہ وت یک نعمتے منـّگا انت۔ البت صحتمندیں قوم وھدے کہ یک 91 یک سالگےءَ قومےءِ مزنتریں راھشون بہ گند انت، گڈا آ ھما قومءِ لایقیءِ سرا شق کن انت۔

پرچاکہ صحتمندیں قوم ھما انسانی ردوما کہ قدرتءَ پہ آواں گيشینتگ گوازین انت۔ و ذمواریاں ھما وڑا ادا کنگا بی انت۔ بزانکہ جوانسالیں چکےّءَ جفا کشگءِ بدلا ماں اسکول و وانگجاھاں گندگ لوٹ انت، پدا ماں کالج و زانتجاھاں راہ ئی دی انت۔ شہ وانگءِ سرجم کنگا پد ضروری تربیت ئی دی انت۔ شہ وانگا و تربیتا گيشگا پد آ وت ذموارییے زیریت و دیما رئوت۔ وتی پیریا کہ سر بیت، گڈا ھر کس ھمے امیدا کنت کہ نیں گس منند بیت و وتی پشتکپتگیں زندا آسودگیا گوازینیت۔ ناکاما یک یا دو کتاب نبیسیت و وتی پڑا رستگیں تجربواں پہ اوبادگاں پھازیت۔ وھدے ھمے صحتمندانءِ چم بلوچ قومءِ سرا کپ انت و گند انت کہ نواب خیربخش مریءِ وڑیں 91 سالگے قومءِ سیاستا سروکی کنگا انت، گڈا بلوچ قوما گوں 21 کمی قرنءَ ھمردیں قومے نہ گند انت۔ ھمے سببا ھما کمکاں کہ قوم شہ جھانءَ دلمانگ انت ھم زبھر بیت۔

ءَ؛ کارمرزیءِ تچکین راهبند: ولید گربنی

واجہ مزار بلوچ، شما شہ درھباتا پد نبشتہ کتگ "تو گْوش ئے کہ من بازیں اَڑ پاد کُتگ کہ چہ ایشانی تہ ءَ بازینے ءِ سرا شُما انگت پولکاری نہ کُتگ ۔۔۔"

إدا شما 'ءَ'ءِ کارمرزیا بہ چار إت۔ شما نبیستگ "'چہ إیشانی تہءَ' بازینےءِ سرا شما پولکاری نہ کتگ"۔ إے گالردا 'تہءَ' 'تھا' نبیسگ بہ بیت شرتر إنت۔

شہ برزا داتگیں رداں پد شما نبیستگ:

واجہ گربُنی، منی پاد کُتگیں اَڑاں یکرندے پدءَ شَرّی ءِ سرا بہ چار ءُ من ءَ بہ گْوش کہ اے پاد کُتگیں اَڑانی تہ ءَ کُجام اَڑ چہ تئی نبشتہ رھبند ءَ ڈَنّ اِنت کہ شُمارا آئی بابت ءَ سرپدی مہ بیت۔

برزا داتگیں گالرد أگر من نبیستین أت، گڈا چؤش بیتگ أت:

۔۔۔۔ یکرندے پدا شرّی سرا بہ چار و منا بہ گش کہ إے پاد کتگیں أڈانءِ تھا کجام أڑ چہ تئی رھبندا ڈن إنت کہ شُمارا آئی بابتا سرپدی مہ بیت۔

بزان شمئے نبیستگیں 'پدءَ، منءَ، تہءَ، رھبندءَ و بابتءَ' من 'پدا، منا، تھا، رھبندا و بابتا' نبیستگ إتنت۔ شمئے گالردا 'ءَ' غیر ضروری کارمرز بیگا إنت۔ خاص 'بابتا' گال ھمے وڑا سرجم بیت إنت۔ إیشیا 'بابتءَ' نبیسگ چٹا رد إنت۔

دیمترا شما گش إت "منی پاد کُتگیں دْرھیں اَڑ گوں تئی نبشتہ رھبند ءَ بندوک اَنت۔ اگاں شُما پولکاری نہ کتگ ءُ وتی نبشتہ رھبند جوڑ کُتگ گُڑا چُشیں رھبندءِ تہ ءَ ردی الّمیں ھبرے"۔

واجہ مزار! من ھچ جاگھا نہ گشتگ کہ منا نبشتہءِ راھبندے ھست۔ من مدام سید ھاشمیءِ راھبندا نبیستگ و أنگت نبیسگایاں. ألبت منی خیال ھمیش إنت کہ 'ءِ' باروا سید ھاشمیءِ داتگیں سوجاں دوارچاری ضروری إنت۔ و أگر ھما پڑا کہ من وتی لیکہ درشان کتگ أنت؛ چارگ بہ بنت، گڈا منی خیالا بازیں کس ھمے مار أنت کہ بلوچیءَ نبیسگءِ یک کسانیں جیڑوے گيشیت۔

ھمے پڑا من پولکاری کتگ و سرپدی رستگ که نامییں بلوچ ندکار و شاعر واجہ أکبر بارکزئی شہ من پیسر ھمے نبیستگ کہ 'ءَ' وا چٹا کارمرز مہ بیت۔

ألبت من چارتگ کہ گوں 'ألف' سرجم بیوکیں گال چؤش کہ 'استا'، حساب (1،2،3) و خاصیں نام' چوش کہ 'محمد، علی، أمیر، گوھرام، کوئٹہ، کیچ، زاھدان، بلوچستان۔۔۔ أگر 'ألف' دیگ بہ بنت، گڈا وانوک إش سرپد نہ بی أنت۔ آدگراں سرپد بیگا ھچ مشکل نیست إنت۔

نامییں ندکار واجہ غلام فاروق بلوچءَ شری سرا سوج داتگ کہ کارگال کہ 'جارییں' (کنٹی نیوس) حالتا شون دی أنت، باید گوں 'ألف' سرجم بہ بنت۔

مثال:

سید سرکچ داتگ: 'روگءَ إنت، روگءَ أت، روگءَ إت أنت' نبیسگ بہ بنت۔

غلام فاروق گشیت: روگا أنت، روگا أت، روگا إتنت'، شرتر إنت۔

من إدا واجہ غلام فاروقءِ پلانگریاں زیراں۔

پمیشا من ھمے لیکاں کہ 'ءَ'ءِ کارمرزیءِ باروا منی پولکاری باز إنت و إیشیءِ باروا تئی ھر جستءِ پسّوا من دات کناں۔ سرجمیں لبزانکی جیڑواں منا سرپدی نیست۔

دیمترا شما داتگ "عطاشاد ءِ شئیرءِ سرا شُمئے “گُمان” ءُ “دلجمی”ءِ بندیک انگت نہ سِستگ ءُ اے گُمان ءَ درشانگ ءَ ئےکہ اے رَکشانی ندکَشّے ءِ دزمانجَنی بوت کنت۔ بلَے اے ھبر ءِ کس نمنّوگر نہ بیت کہ لچّہ کار وھدے وانگی یے نبشتہ کنائین اِیت گُڑا وتی دلجمی ءِ واست ءَ آئی ءِ “پُروف رِیڈنگ” ءَ وت کنت"۔

شمئے خبر راست إنت۔ ألبت بازیں شاعرانءِ شعر شہ آوانءِ بیرانیا پد شنگ بیتگ أنت کہ پہ شاعرءِ جندا شر کنگ إش ممکن نہ إنت۔

چونائیا 'جمع' گالاں پد 'ءَ' کارمرز کنگءِ باروا سیدءِ سوج ھم منی خبراں گوں ھمرد إنت۔ سیدءِ ھمے سوج شما وتی أولی ساھگا آرتگ أت۔ پمیشا من یکرندے پدا گشاں کہ تانگہ ھچ چشیں جمع گالےءِ ترانگا نہ کپتگاں کہ جمع بیگ سببا أگر 'ءَ' دیگ مہ بیت، گڈا معنائی رد بیت۔ ألمـّا شہ من ھزار ھمنچو گیشتر سیدءَ پولکاری کتگ۔ آئی ھم چوشیں دَروَرے نہ داتگ۔

پمیشا أگر 'مچاں کنٹگ پر' نبیسگ بہ بیت بلوچی زبانا و سیدءِ سوجاں گوں ھمرد إنت۔ إلبت أگر إیشی بہ بیت 'مچّانا کنٹگ پر' گڈا قول سید 'بے تام انت'۔

ألبت بہ گشاں کہ رخشانی گالوارا ھست إنت۔ منی خیالا فارسیءِ کارپد أنت کہ رخشانی گالوارا ودی أنت۔

ھمیشیا من ترا مثال دیاں:

ھمے بلوچیءِ 'ءَ'ءِ بزانت ماں فارسی 'را'، ماں اردو 'کو' إنت۔ بلے إنگریزیءَ ھنچؤش کہ بلوچیءَ باز جاگھاں کارمرز نہ بیت۔

گاڑیوں 'کو' دھولو۔

ماشینھا 'را' بشو۔

Wash the vehicles.

گاڑیاں بہ شود۔

إدا گاڑیان'ءَ' بہ شود نبیسگ غیر ضروری إنت یا ھیمیش بہ گش کہ رد إنت۔

تئے واجہ مزارءَ دیمترا گوں یکـّیءِ (واحد) گالاں 'ءِ'ءَ کارمرزی و گون بازیءِ (جمع) 'ءِ' بدلا 'ی' دیگ خبر شرّی سرا سرکچ داتگ۔ تئی مهربانی، من إے باروا ھمے گشگ لوٹاں کہ 'ءِ' دیگ ھم رد نہ إنت، بلّی توریں شمئے سوج روا إنت۔

أگر ما 'مَچّانی کلمپوگ، ھُشترانی مَھار، دْرچکانی تاک، دارانی نِھر ءُ گپّانی مانا'

گالبنداں بہ نبیسیں 'مچانءِ کلمپوگ، ھشترانءِ مھار، درچکانءِ تاک، دارانءِ نھر، گپانءِ معنا' رد نہ إنت و سرکچ دیگ إش آسودگتر بیگءِ ھوریا گوں 'واحد' گالانءِ 'ءِ'ءَ ھمرد إنت۔

پدا ھم من إے تکـّا گيئشتر پولکاری کناں أگر منا جاگھےءَ درورے دستا کپت کہ مردم مان بہ گيشیت، ألمّا شمارا شریدار کناں۔

ھداروکے ھمے 'ءَ'ءِ کارمرزیءِ گپا ما پہ جاھے سر بہ کنیں، گڈا دگہ نیمگےءَ چارگءِ موه گیئشتر رسیت۔

میزران بات

'ءَ' رد کارمرز بیگا انت۔ ولید گربنی

چــنــدی کسان ءَ په بچکندگ و نیم چمی و ناز

چــنــدی کسان ءَ په بـُروان ءِ کمان شنگینته –عطا شاد

خدامرزی عطا شادءِ شعرے ماں پھرہ بلاگا شنگ بیتگ۔ إے شعرءِ یک بیتے کہ برزا داتگ، لایق دلگوش إنت۔

بلوچی زبانءِ راھبندا إیشیءِ تھا 'ءَ' دیگ رد إنت۔ پرچاکہ وھدے گال جمع بیت، گڈا واھُندی ( پوزیسیو)ءِ 'ءَ' دیگ نہ بیت۔ جمعیں گال آئیا وارت۔ ألبت واحد گالا دیگ بیت۔

ھنچوشکہ:

واحد- چکءَ کتاب وانت۔ مردکوءَ ماشین أڈ کرت۔ جنیں آدمءَ پس دوشت۔

جمع- چکاں کتاب وانت۔ مردماں ماشین أد کرت۔ جنیں آدماں پس دوشت۔

باز کس ھمے ردا رد ور أنت۔ خاص رخشانی گالوارا گپ جنوک رد ور أنت۔ یا ھما کہ فارسی إش باز ونتگ و آوانءِ گالوارا فارسی باز کئیت۔

واحد بندیگ کہ بلوچیءِ شونکار إنت ھم ھمے پڑا مانگشیتگ۔ آئیا یک مثالے دات کہ أنگت من ترانگا کپاں، حیران بیاں۔ وھدے کہ بلوچستان ٹی ویءِ مراگشےءَ 'ءَ' ءِ کارمرزیءِ باروا ما گپا إتیں و من ھمے لیکہ درشان کت کہ ما إیشیا سر وت ھر جاگہ کارمرز مہ کنیں، گڈا گشت ئی کہ أگر کارمرز مہ بیت، بازیں گال بے تام بی أنت۔ آئیا 'نان'ءِ مثال دات و گشت ئی "أگر ما بہ نبیسیں 'نانانا' (نانءِ جمع) بد وڑ بیت۔ ألبت أگر بہ نبیسیں 'نانانءَ' بیار شر إنت۔

راستی إیش إنت که بلوچیءَ 'نانانا' گال کارمرز نہ بیت۔ 'ناناں' کہ جمع گالے إنت؛ 'ءَ' وارت۔ پمیشا 'ناناں بیار' گالردا سرجم کنت۔

بلوچی میزران بات.

ولید گربنی

سر کن، پر کن، ھپ کن، ھچ۔ چمشانک: ولید گربنی

یک رندے پدا حال پروشت کہ منیر مینگلءَ لانکارتگ۔ إے رندی ٹلوژن چئنلے پاچ کنگا إنـّا۔ پرچاکہ شہ آئیا دگراں باج برت؛ شہ آئی پیسر دو بلوچی ٹی وی چئنل إش بندات کت أنت۔ دریگتیں منیر مینگل پاکستانءَ دستگیر مہ کتین أت، گڈا أولی چئنل ھمائیءِ بیتگ أت۔

خیر! آئیءِ نہ بیت پرواہ نیست، دگراں وا کت۔ پدا إیش کہ بلوچستانءِ جیڑہ إیوکا یکـّے نہ إنت کہ پھک ھمائیءِ نیمگا دلگوش بہ دی أنت۔ ھمے مارشت شاید منیر مینگلءَ ھست أت۔ پمیشا إے رندی آئیا لانک بست کہ سرجمیں بلوچ سیاسی لیکواں یکجاہ بہ کنت۔ ھما وڑا کہ خان قلاتءَ کتگ أت۔ ألبت خان قلات إنچوک کہ منیر مینگل بلد نہ أت۔ منیرءَ ثابت کت کہ آئی پھتہ تر إنت۔ پمیشا آئیا إے تاریخی مچّی ماں بنکاک سرجم کنائینت۔

دیوان بیت، گپ و گشتانک بیت أنت۔ لیڈر ھما إتنت کہ چدا پیسر آوانءِ باروا بلوچی نیوزءَ لیکہ درشان کنگ بیتگ۔ بزاں ڈالچار کتگیں و یا کاھلیں۔ إیشانءِ ردا ھماکه آوانءِ باروا چدا پیسر گشگ بیتگ کہ بلوچ دشمن أنت؛ چؤش کہ جمعہ چکءِ میرھزارخان مری۔ ھماکه چدا پیسر ڈالچار بیتگ أنت؛ چؤش کہ داکٹر واحد و طارق صابرو۔ ھما کہ چدا پیسر کاھلانءِ رما ھؤر بیتگ أنت۔ چؤش کہ زرمبش؛ ھو، مئے وتی بلوچستانءِ راجی زرمبش و مئے وتی مھراب سرجو۔

ھمیش پھک یکجاہ بیت أنت۔ إیشانءِ سوج دیگا خان قلاتءِ کلہ ھم وانگ بیت۔ ھما خان قلات کہ بازیں کس أنگت سرپد نہ أنت کہ کجا بوجیگءِ مسافر إنت و یا ناخدا إنت۔ ألبت وتی دپا أعلاحضرتءَ گشتگ کہ آئی ناخدائی کنگا دلمانگ نہ إنت۔ بلے إنسان آخر إنسان إنت۔

دیمتری سوج دیوک یک میان اُستمانی گلےءِ سروک أت۔ آئیا دیوانا بهر زیروک سوج دات أنت کہ أگر آواں آزادی لوٹ إت، گڈا چیئر لنٹاں بہ لوٹ أنت۔ پرچاکہ دپا آزادیءِ ناما گرگ مرچاں فیشن نہ إنت. فیشن خلافا روگءِ درگتا بلوچاں دنیا ڈوباریت۔ إے سوجکار 'یو إین پی او'ءِ کارگشاد 'مرینو بزداچین' أت۔ ھمے یو إن پی اوءَ دو بلوچ سیاسی گل ھؤر أنت و بلوچستانءِ مشرق و مغربءَ نمایندوی کنگا أنت۔ نام إش بلوچستانءِ اُستمانی گل و بلوچستان مینگل پارٹی أنت۔ إے وڑا چہ پُشتی دروازگا إیشاں ھم وتی لیکہ ماں دیوان درشان کنائینت أنت۔

مرینوءِ خیالا بلوچ وتی حقاں بہ لوٹ أنت۔ آزادی إنّا۔ إے وڑا دنیا آوانءِ خبرا گوش داریت۔ ألبت آئیا سرکچ نہ داتگ کہ خبر گوشدارگا رند دنیا چے زحم جنت۔ شاید ھما کہ پہ کردان جنگ بیتگ، پہ فلسطینی و پہ دگہ پادمالیں قوماں جنگ بیتگ؛ پسانءِ ڈولا واڑ کنگ بیتگ أنت و پدا دشمن گشگ بیتگ أنت کہ بیا أنت، وتی بمباں ألگچ کن أنت تاکہ گيئشا شہ گيئشتر بہ مریت۔ ھلپجہ و غازہءِ نوکتریں حال أنگت ھچ کسا نہ شموشتگ أنت۔
چیر لنٹاں آزادیءِ لوٹءِ گپا وانگا پد مردم یک گشکندےءِ ترانگا کپیت۔ ملانصیر الدین نامینے ماں مارکیٹےءَ نشتگ و جگر بھا کنگا أت۔ ألبت آئی توار کنگا أت ''بیا إت بٹـّاگ أنت، شرّیں بٹــّاگ أنت؛ تازویں  أنت''۔
ھمے درگتا یک راھگوزےءَ جُست کت  "ملا  تو وا جگر بھا کنگائے، پرچا بٹـّاگءِ ناما کوکـّار کنئے؟"
ملا نصیر الدین پسّہ دات "ھو، من کور نہ آں۔ نے کہ من ناسرپدے آں۔ أگر من إیشاں جگر بہ گشاں، گڈا دیم پہ دیما نشتگیں پشـّی کـُپّ کنت و إے جگراں وارت"۔

منیر مینگل کہ إے دیوانءِ سرجم کنوک أت و شہ إد اودا پنڈ سِنڈ ئی کتگ تانکه دیوان و مهمانانءِ خرچ به گیش أنت؛ پھکانءِ دیما ظاهر بیت۔ پیسرا ٹلفی رابطہ بیتگ أنت۔ نیں ظاهر بیت. ألمّا چدا پد ھچ کس آئیءِ خبرا باور نہ کنت۔ دگہ دیوانے دارگ منیر مینگلءِ ھَوبتا شہ در کپتگ۔ ألبت منیر نیں دگہ پندلے سازیت۔ آئیا پاکستانی چاریگانءِ دماگاں ھینگ مان کت۔ دلپاکیں مغربیانءِ بازار چے إنت!

دیمتری آ دگہ کارانءِ کشا چؤش ھم بیت کنت باندا روچ جار پرّینگ به ییت کہ منیر مینگلءَ گوں پاکستان صلح کت۔ پرچاکہ منیر مینگلءِ سروکیا بلوچ قومءِ آیندہءِ باروا گوں پاکستان مزاکرات کامیاب بیت أنت! أگر په دل ھنچؤش بہ بیت، کسے ھست کہ منیرءِ دیما بہ داریت؟ زاناں بلوچستانءِ سیاست کسےءَ ٹیکہ زرتگ کہ شہ منیر گوں پاکستان مزاکرات کنگءِ حقا پچ بہ گریت؟ إنـّا۔ إیشی منیر مینگلءِ حق إنت۔

ھمے کانفرنسءِ باورا گپ إیش إنت کہ جعمہ چکءِ ھزارخان مریءِ باورا رسانکاں ھچ نہ کشتگ۔ إیوکا دلپاکیں داکٹر واحد بلوچءَ لھتے عکس گپتگ أنت و وتی بلاگاں داتگ أنت۔ بی بی سیءَ وا خان قلاتءِ کلہ شہ داکٹر جمعهءِ گپاں گيئشتر أھمیت داتگ۔ طارق و مھرابءَ شاباش بات که وتی خبر إش ٹک گشتگ أنت۔ ألبت زرمبشءِ نمایندوا أگر مغربی بلوچستانءِ جیڑہ دیما آرت نہ کت، میار ئي پر نیست۔ پرچاکہ ھمے وھدا شومّیں گجراں جند۔۔۔۔ءِ سروک عبدالمالک ریگی دستگیر کت۔ پمیشا زرمبشءِ لیڈر واجہ إسماعیل أمیری مجبور بیت کہ إیرانءَ میان اُستمانی قانونا پادمال کنگءِ سببا بہ ڈوباریت۔

ھمے وڑا وینڈی جانسنءَ صد آفرین بات کہ ماں أمریکا سرجم کتگیں أحمر مستی خانءِ کانفرنسا رند آئی گوں نیکیں نیت و پھکیں دلےءَ بنکاکءَ منیر مینگلءِ کانفرنسا ھم وتی چمشانک دات۔ توریں بلـّی أحمر مستی خان و منیر مینگلءِ نیاما فرق ھرجاہ تالان بیت أنت۔ بلے یک بلوچ دوستےءِ حسابا وینڈی جانسنءَ وتی خیال درشان کنگی بیتگ أنت وا بس۔ بلوچستانءِ ناما کانفرنساں حالکارانءِ أھمیت باز إنت۔ شر ط إیش إنت کہ حالکاراں ھماوانءِ مقام دیگ بہ بیت۔

سرجمیں گپ جنوکانءِ ترانانءِ پسّہ یا بـُچکہ، منی خیالا، ھندوستانءِ 'إنسٹیٹیوٹ آف ڈفنس سٹڈیز أنڈ أنالائسز‘ءِ باسک 'سشانت سیرین'ءَ درشان کتگ أنت۔ آئیءِ صداں خبرانءِ یکجاھی ھمیش إنت کہ 'بلوچ وتی قدّا پـجّا بیار أنت'۔ بلوچاں پُھتویں لیڈر نیست إنت و تپاک نہ أنت، و پدا آوانءِ کش گوَراں ھستیں جاور (پہ جنگا) ھمراھداری نہ کنگا أنت۔

ألبت چؤش ھم بیت کنت کہ بلوچ لیڈرشپءِ باروا سشانت سیرینءِ آسرگری ھمے دیوانا بھر زیروکیں مردمانءِ گندگا رند دستا آتکگ۔ أگر آئیا داکٹر مالک، داکٹر جھانزیب، داکٹر اللہ نظر و دگہ گچینی سیاسی فلسفہ زانت بہ دیستین أنت، لیگہ ئی دگہ بیتگ إتنت۔ میر خیربیار و میر براھمدغءِ ٹک جوابیاں شاید سشانت زبان بند بہ کتین أت۔

سلاحبندیں جنگءِ باروا چؤ منیں باز کس گوں سشانت ھمخیال بنت إنت۔ ألبت باندا روچ أگر ناصر بلیدائیءِ سر آنگر کپت، گڈا مردم اُمید کنت کہ آزادیءِ لوٹءِ ردا و پہ إیشی سیاسی جھد کنگءِ باروا سشانتءِ دیما قول ھِندی بتلا ' آپءَ آپ و شیرءَ شیر کنت'۔

بلوچی نیوز