تباھِگ بلوچانی قومی وراکے اِنت

تباھگ پہ خشک کنگا روچتاپءَ درتکگ اَنت۔ عکس: اے بی بلوچ

بلوچی و نارویجی زیمل ھوار بوت اَنت

استاد غلام رسول دینار زھی ءِ ازم و زندءِ سرا پولکاری کنگا بلوچی لبزانکی گل چھبار سئے جتائیں تَک ٹھین اِیت: محمد فاروق ھوت

پہ اُستاد غلام رسول دینار زئی ءِ ازم و زندءِ سرا پولکاری کنگا بلوچی لبزانکی گل چھبار سئے کمیٹی جوڑ کنت۔ بلوچی لبزانکی گل چھبارءِ سروک محمد فاروق ھوتءَ گوں بام ھالءِ جھگیرا گپ کنان اے خبر درشان کت۔

آئیا گشت کہ اُستادا پہ زیمر، شاعری و زبانءِ بانداتا باز کار کتگ۔ آئیءِ ازم و لیکواں پہ نوکیں نسلا پشت گیجگءِ مقصدا بلوچی لبزانکی گل چھبار ھمے زیتاں سئے تک اڈ کنت۔ یکے پہ آئیءِ ساز و زیملءِ پڑا کرتگیں کارانی یکجاہ کنگا، دگرے پہ آئیءِ شعرانی سرجم کنگا و سئمی یک میوزیمے جوڑ کنگا کہ ایشیءِ تھا گوں استادءِ زندا بندوکیں سامان ایر کنگ بی اَنت

واجہ ھوتءَ دیمترا درّئینت کہ استاد گوں وتی ازما دلستکی بندوک بیتگ۔ پمیشا آئیا وتی ازم لاپ جوڑ نہ کرتگ و یک مھتریں کارےءِ پیما کرتگ۔ ھنوگیں دورا کہ گشندوانی جھد پہ کیسٹ جوڑ کنگ وتا نامدار کنگا اِنت؛ اُستادا کیسٹ ریکارڈ نہ کنائینتگ۔ گوں ازما آئیءِ مھر و بندوکی سک برز تر اَت۔ آئیا ھمیش گشتگ ات کہ زیمرساچیءِ یک ازمے آئیا ھست، پمیشا شہ گشندویا گیشتر ھما پڑا دلگوش بہ دات۔

واجہ ھوتءَ جار پرّینت کہ بلوچی لبزانکی گل چھبار پہ استاد دینارزئیءِ یاتگیریءَ ھمے زیتاں یک مزنیں دیوانے سرجم کنت۔ اے دیوانا گوں ازم و لبزانکا بندوکیں سرجمیں بلوچستان مردم لوٹائینگ بی اَنت تانکہ آئیءِ ازمءِ سرا الکاپیں چمشانک دات بہ کن اَنت۔

مسقطءَ برجم دارگ بیتگیں رستم میرلاشاریءِ زیملی مراگشءِ چارگا 1800 کس شتگ انت

رستم میر لاشاریءِ فیس بوکءِ کلوےءِ ردا ماں مسقط برجم دارگ بیتگیں آئیءِ زیملی مراگشءِ چارگا 1800 کس شتگ اَنت۔

ایش ماں یک دریں ملکےءَ پہ یک بلوچی زیملی مراگشےءِ چارگا شتگیں مردمانی مزنتریں حساب اِنت۔ پرے کارا رستم میرلاشاری گوں ھمراھاں لایق ستا اِنت۔

نامداریں بلوچ گشندہ غلامرسول دینارزئی بیران بوت

چوش کہ ودی اِنت، امبری پہ بلوچ گشندواں شریں سالے نہ اِنت۔ یک پہ یکّا مارا یلہ دیگا اَنت۔ بشام بلوچ شُت، عزیز بلوچ بیران بوت، تاجل بریسی ھم ملکموتءَ وتی ھرجاں زرت و باسک سایٹا شنگ بیتگیں حالےءِ ردا غلامرسول دینارزئی ھم دلا گپتگ و مرچی بامگاھا بیران بیتگ۔

بلوچی نیوز غلامرسول دینارزئیءِ بیرانیا پدردی درشان کنت۔ استاد دینارزئی یک بے دروریں زیملی استادے ات۔ آئی زبان و زیملءِ تکاں شری سرا سرپد ات۔ آئیءِ روگ پہ بلوچی دودمان و زیملا زنڈیں تاوانے اِنت۔ الّما آئیءِ نام نمیران اِنت و دعا اِنت روحی شادان و پشپدان ئی اے سکّیا سگگءِ اوپار بات۔

زبان و سرڈگارءِ وڑا بلوچی دود ربیدگ گوں خطراں دیم پہ دیم انت: ولید گربنی

بلوچ دودربیدگ دنیاءِ کوّاساں یکـّے شہ کوَھنتریں دودربیدگاں ظاھر کتگ۔ پہ مثال 'اتنولوگ' نامیں کتابے کہ دنیاءِ پجّار ئی درجہ بندی کتگ، ایشیءِ 16 می چاپا بلوچی پجّار کہ مزنتریں نشانی ئی بلوچی زبان انت 97 می درجہ داتگ۔ ھزارانی زبان و کلچرانی تھا بلوچیءَ 97 می درجہ رسگ یک برزیں مقامے انت و پیئشداریت کہ بلوچ یک کوھنیں دودربیدگےءِ واھند انت۔

اگر بلوچ وت وتی چاگردا چماں شانگ بہ دی انت، گڈا ودی بیت کہ بلوچءِ قولءِ پایداری، بلوچءِ میارجلـّی، بلوچءِ مھمانداری، بلوچءِ سیر سانگ و یا هشر مدد و گڈ بجاری بلوچءِ کوھنیں دود انت کہ بلوچ دود ربیدگءِ سراگاھیا شون دی انت۔ گوں اے وڑیں دوداں کوّاس بلوچانی پجـّاراں گوں بیست یکـّمی قرنءِ ضرورتان ھمرد منّ انت۔ البت بلوچان سرپد بیگ لوٹیت کہ مرچییں دورءِ بدلیاں بلوچ دود ربیدگ پلگاریا نہ اشتگ و ایشیءِ تھا کشی رسم پترتگ انت۔

چدا پیسر بلوچستانءِ سرڈگارءِ طبیعی و جغرافیائی ھندا بلوچ کمک کتگ انت کہ آ وتی زبان و دودربیدگا شہ ڈنی اثراں بہ رکـّین انت۔ پیسری دئورا کہ مردمانی ضرورت کشت کشار و مالداری بیتگ انت، مردم شہ مشرق آتکگ دیم پہ مغربءَ شتگ ات یا شہ مغرب آتکگ دیم پہ سند شتگ انت۔ هما ھنداں شتگ انت که آپ باز بیتگ، زمین ھم پہ کشت کشارا بروبر بیتگ۔ ھموداں مردماں مال چارینتگ انت و کشت کشار اش کتگ۔ تاھاپ و کوھستگیں بلوچستان پہ آواں ایوکا یک راھے بیتگ کہ شہ اودا گوستگ انت۔

نیں دنیاءِ مردمی آبادیءِ ردومءِ سببا ملکانی ضرورت ایوکا گوں کشت کشار و دلوت رودینگا پیلو نہ بیگا انت، آ پہ دگہ آسراتیانی درگیجگا درکپتگ انت۔ پمیشا بلوچستانءَ ھرید آرتگ۔ بلوچستانءِ معدن بہ بنت یا ایشیءِ زربار و سرڈگارءِ پراھی؛ پہ شدیگیں ملکاں شرّیں سیاسی و معیشتی آسراتی انت۔ ھمے سببا شہ ایرانءَ فارس، شہ پاکستانءَ پنجابی، مھاجر و پٹان، و شہ افغانستانءَ پٹان و دگہ افغان ھیلگر بیتگ انت۔ ایشانی کشا میڈیاءِ ردوم و درامدیں دودربیدگ، سیاست و لبرانکی تبلیغاں بلوچ سرڈگار، زبان و دودربیدگ وتی انگرّا کتگ انت۔ ھمیشانی کارپد بلوچ دود ربیدگءِ تھا ظاھر انت؛ ما گندیں کہ لھتے جاگھاں دوچاپیءِ جاگہ 'ڈانڈیا'ءَ گپتگ۔ اے حسابا بلوچ دودربیدگ ھما وڑا کہ سرڈگار و زبان انت، گوں کوردیمیں خطراں گر چیل انت۔

اے حالتاں پہ وتی پجّار؛ زبان، سرڈگار و دودربیدگءِ رکـّینگا بلوچ سرکلءِ ھر توجیل لایق ستا انت و باید اے رستگاری گامگیجاں بلوچ مردم وتی ھَوبَتا کمک بہ کن انت۔ اگر کمک کنگءِ توان مہ بیت، کما شہ کمتر دلپرؤش اش مہ کن انت۔

پاکستانی واکداراں دو بلوچستانی گشندہ دستگر کت و چیریں جاھےءَ برت انت

شہ مشرقی بلوچستانءَ رستگیں حالےءَ داتگ کہ براھوی زبانءِ دو گشندہ شہ کوئٹہ دستگیر کنگ بیتگ انت۔ پاکستانی سلاحبندیں واکداراں شپءِ کلاک 11ءَ کوئٹہءِ یک ھوٹلےءَ بیڑ بُرتگ و اودا جلـّتگیں گشندہ جان ثاقب و آئیءِ شاگرد ندیم شھزاد دستگیر کتگ انت۔ جان ثاقب براھوی زبانءِ نامداریں گشندوے انت و وتی شاگردءِ ھمراھیا پہ سوتءِ رکارڈ کنائینگا دو روچ ساری کوئٹہءَ آتکہ بیتگ۔

حال بلوچ یونٹی کانفرنسء منـّتا

عرب اماراتءِ قومی روچءِ درگتا بلوچی دیوان

بلوچی سازءُ زیملءِ دیم پہ زوالا إنت- عبدالوهاب إیراننژاد

--- کراچیءِ غیر بلوچیں زیملکار ءُ إسٹوڈیو صاحب کیسٹان هپتگے توکا درکن أنت. إشانءِ وتگڑ ءُ گیگانیں موسیقی نہ بلوچی أنت ءُ نے کہ دگہ همساهگیں قومانے أنت. یک سرابرائیں ءُ بے بنیادیں موسیقی یے کہ إیشیءِ سرا مردم نہ کند إت ءُ نہ کہ گریو إت کنت...

سرجمیں نبشتانکا بہ وان ات۔

Rights reserved by www.balochinews.com

نامدارین بلوچ گشندہ ولی محمد بلوچ بیران بیت

نامدارین بلوچی گشندہ ولی محمد بلوچ نزیک 68 سالءِ عمرا مان کراچی بیران بیت۔ آئیءِ نادراھیءِ سبب لاپءِ کئنسر گشگ بیتگ۔ سرباز داٹ کامءِ داتگین حالءِ ردا ولی محمد 11 ستمبر صحبءِ کلاک 11ءَ یے کوڑوین دنیا رنبیئنتگ۔

ولی بلوچ بندرا کراچی جاہ منند بیتگ و یکَےءِ چہ کوئھنترین بلوچ گشندوان اَت۔ آئیا لھتے سال بیتگ کہ مان دبئی کاربار کنگا بیتگ۔

ولی بلوچءِ زھگ ساجد ولی یکّے چہ نوک باھندین گشندوان حساب بیت۔ بلوچی نیوز یے دؤدربیدگی مڈ ّیءِ زوالیا دل پہ دردی درشان کنت و وتا ولی بلوچءِ پشت پدانءِ دردان شریدار حساب کنت۔

دؤد ربیدگی حال

نامدار و وشتوارین گشندہ واجہ سعید برھانزئیءِ ساڑیین سی ڈی و ڈی وی ڈی "آھوءِ صحرائی"ءِ ناما ساڑی اَنت۔ اشانءِ دیئمدرائی دیوان شنبہ 27 ستمبر 2008 بیگاہءِ کلاک 18:00 مان سویڈن برجم دارگ بیگا اِنت۔

گل خان نصیرءِ شعرانءِ آھوءِ صحرائی البم واجہ سعید وتی مکھین مات شھناز و بلوچستانءِ ناما کتگ۔

پھرہ بلاگ شنگ بیتگین جارءِ توکا شه پهکین بلوچ بیئل، براهندگ، سنگت، دود ربیدگی جهدکار و زانتکاران که گون بلوچی زبان و زیئمل مهرش هست، بھر زیرگءِ دستبندی کنگ بیتگ۔

ڈس: Bro : Finnstaskolan Finnstasalen

بلوچ رنگرزانءِ جؤڑ کتگین عکسانء پیئشدات سویڈنءَ بنا بیت

بلوچستانءِ رنگرز بانک سیما سردارزهی و حسن یادگاریءِ جؤڑ کتگین عکسانءِ پیئشداشت مان سویڈنءِ شھر بروسءِ بنجاھی کتابجاہءَ بنا بیت۔ لھتے عکس و سرجمین حالءَ بہ وان اِت ادا۔

بلوچ کمیونٹی لندن-ھانسلوءِ نیمگا زیملی دیوان برجم دارگ بیت

بلوچ کمیونٹی ھانسلو -لندنءِ زیملی دیوان برجم دارگ بیت و اشیءِ توکا وشتوارین گشنده رستم میر لاشاری، نامیین زیملکار واجہ عبدالرحمان سوریزھی و آوانءِ سنگتے‏ءَ وتی پڑان دستا آرتگین پُھتوی پیئش داشت أنت۔ گون اشان ھؤر بانک مھناز بلوچءِ وشین توارءَ مردم حئیران کت اَنت۔

واجہ حسن ھمدمءِ جارچینیءَ دیوانءَ چہ زیملی مراگشءِ بُندات بیگا پیئسر پہ کـُشگ بیتگین بلوچ شهیدان؛ خاص پہ یعقوب مھرنھاد فاتحہ وانت۔ پہ لندنء بلوچان یے زیملی دیوان یک دراجکشین دئورےءَ چه رند برجم دارگ بیت کہ اشیءِ سوبینیءِ تاج واجہ میر غلامحسینءِ سرا زیئب دات۔ مان ھانسلو نندوکین نوجوان ھم دیوانءَ آتکگین مردمانءِ خدمتا لکّ پاد اوشتاتگ تنت۔

۔

دیوانءَ یے شرپ هم رَسِت کہ وتی نیاما راجی شاعر واجہ میجر مجیدءَ به گندنت۔ مینلءِ ھینـّيان رَزینوکین اسماعیل ممتاز گون وتی شعرےءِ وانگا دیوانءِ تام وشتر کـُت ۔ داتگین عکس چہ ھمے زیملی دیوانءَ کشگ بیتگ اَنت۔ بلوچی نیوز رپورٹ

مغربی بلوچستان: ماں 'بریس' بلوچ شاعر صدیق سیلمیءِ یادءَ دیوانے

بلوچ شھزانت عبدالحسین یادگاریء یادا دیوان

واش شھرء دؤد ربیدگی بنجاءء پاگواجھا جار پـرّینتگ کھ 17 اکتوبر ماں واش عبدالجسین یادگاریء یادا دیوانے دارگ بیگا انت۔ ماں اے دیوانا بازیں ملکی و درملکی مھمان بھرزیرگا انت۔ بانک کرینا جھانی یکے چھ مھماناننت۔

اے نامداریں بلوچ شھزانت 1942 ودی بیتگ و 12 ستمبر 2006 ماں یک اکسیدنـٹیا بیران بیتگ۔
فارس نیوز

ماشااللھ بامری ماں تھرانء زیملی دیوانا

زیمل ھاؤس؛ ماں تھرانء 'مزنیں راجی دیوانجاھا' یک زیملی دیوانے 15 اکتوبر برجاہ دارگا انت۔ اے دیوانا گؤں 'کامکار' وحسن علیزادہ ھؤر نامداریں بلوچ زیملکار واجھ ماشااللھ بامری و آئیء ھمراہ وتی ھنرا پیش داریتنت۔ مھر نیوز 9 اکتوبر